10. 8. Diverses leçons en l' Histoire de la Royne Brunehaud, Gregoire de Tours, S. Gregoire Pape.

Diverses leçons en l' Histoire de la Royne Brunehaud, avecques un sommaire discours de ce qu' on trouve à son advantage, tant dedans Gregoire de Tours, que S. Gregoire Pape.

CHAPITRE VIII.

Apres vous avoir discouru & justifié ce que je pense veritable en l' histoire de Fredegonde, je viens maintenant à celle de Brunehaud: En laquelle je supplie le Lecteur s' armer de patience, jusques à la closture de mon compte, me promettant que pour fin de jeu il y trouvera matiere pour se contenter. Jamais lignee ne fut affligee de telle façon comme celle de Brunehaud par la famille de Fredegonde. Galsonde sa sœur aisnee deuxiesme femme de Chilperic, estranglee dedans son lict, Sigebert son mary assassiné, Childebert fils de luy empoisonné, le tout par les artifices de Fredegonde. Et apres son decez les enfans de Theodoric fils de Childebert occis, & leurs Royaumes empietez par Clotaire fils de Fredegonde; & finalement Brunehaud cruellement mise à mort. Grandes certes, & merveilleuses afflictions: mais cette-cy paravanture non moindre, qu' apres la mort espouventable de cette Princesse, le battu a payé l' amende. Car la plus part des plus anciens Autheurs, qui depuis Gregoire de Tours ont escrit nostre histoire, luy imputent tous les malheurs qui lors, & auparavant estoient advenus en la France, & la publient pour la plus furieuse Megere, qu' oncques comparut sur la face de la terre. Ce que j' oze attribuer, non tant à la verité de l' histoire, qu' au bon-heur du Roy Clotaire son ennemy, pour excuser l' inhumanité barbaresque dont il la traicta à sa mort. Et qui est encore plus esmerveillable, c' est que si cette Royne fut cause pendant sa vie de plusieurs guerres, & divisions entre les Roys Theodebert & Theodoric ses petits enfans, ainsi que le porte la commune leçon, elle n' excita pas moins de partialitez entre ceux qui escrivirent sa vie. Uns Fredegaire, Aimoïn, Gaguin & Gilles, du tout voüez à mesdire d' elle: Au contraire nostre gentil Paule Aemile, & du Tillet Evesque de Meaux à l' excuser, & soustenir que la plus part de ce que les anciens en avoient mesdit estoit faux. Il n' est pas qu' entre ceux qui de plus fraische memoire ont mis la main à la plume, il n' y ait pareilles partialitez. Car Pierre Masson, qui par un nom emprunté de Tite Live, s' est appellé Papirius Massonius, & apres luy Jean Mariana Espagnol sont formellement pour le dernier party: Contre lesquels Haillan, Veignier, Belle-forest, Serre & Fauchet sont pour le premier. Je donne cet ordre à ces cinq, non sur le poids de leurs merites; ains selon qu' ils mirent leurs œuvres en lumiere: Quant à moy sans m' arrester à ceux-cy, desquels toutesfois j' entens parler avecques tout honneur, je me delibere de deduire par ce Chapitre, tout ce que j' ay trouvé de bon & mal d' elle dedans deux Autheurs qui sont sans reproche, pour avoir vescu pendant la vie de cette Princesse.

Le premier que je voy en avoir parlé est Gregoire Evesque de Tours, quand il dit que Sigebert Roy d' Austrasie, plus sage que ses trois autres freres qui s' adonnoient à amours lubriques, rechercha en mariage Brunehaud fille d' Athanaïlde Roy d' Espagne. Erat enim puella elegans opere, venusta aspectu, honesta moribus, atque decora, prudens consilio, & blanda colloquio. Car elle estoit (fait-il) accompagnee d' une bien-seance en ses actions, belle à qui la regardoit, bien morigenee, sage en ses conseils, & d' un doux entregent. Cela mesme est confirmé par Fortunat Evesque de Poictiers l' un des premiers Poëtes de son temps, quand au 6. livre de sa Poësie parlant d' elle il dit.

Pulchra, modesta, decens, solers & grata, benigna, 

Ingenio, vultu, nobilitate potens.

Et ayant esté cette Princesse de cette façon depeinte par Gregoire, il dit que apres avoir esté catechisee, & espousé la Religion Catholique, au lieu de l' Arrienne en laquelle elle avoit esté nourrie en Espagne chez son pere, le Roy Sigebert tout d' une suite l' espousa. Et tant & si longuement que ce Roy vesquit, je ne voy dedans Gregoire, qu' il soit parlé en bien ou en mal d' elle. Qui ne luy est pas un petit honneur: Car à bien dire la femme n' est peu honoree, qui sans mettre ses deportemens à l' essor, reduit toutes ses volontez à la volonté de son mary. Soudain apres le decez de luy, je la voy mise sur les rangs en deux actes: L' un quand advertie de cette mort inopinee, elle fait sortir de nuict à petit bruit sur les murailles de la ville dedans une corbeille, Childebert son fils; lequel par l' entremise du Capitaine Gondebaud, fut conduit à Mets, & couronné Roy d' Austrasie, aagé seulement de cinq ans: L' autre quand Chilperic insolent en sa bonne fortune, advenuë de l' assassinat commis en la personne de Sigebert, confina cette Princesse en la ville de Rouen, pour y terminer ses jours; où elle espousa quelque peu apres Meroüee, fils aisné de Chilperic. Le premier fut un acte de bonne & sage mere: Le second fut conduit par deux ames aveuglees de passions, l' une de l' amour en Meroüee, l' autre de la vangeance en Brunehaud. Car si ce mariage luy eust reüssi suivant son souhait, c' eust esté un admirable traict de vangeance digne d' estre trompeté dedans une longue posterité, se vangeant de la mort de son mary, par le fils contre le pere son ennemy. Mais il y eut tres-grande faute de prudence: D' autant que le lieu où le mariage se fit estoit sujet au Roy victorieux, & le peu de gens de main qu' ils avoient pour leur faire espaule, les devoit destourner de cette entreprise, comme l' evenement leur monstra. Que s' ils l' eussent differee jusques à ce que cette Princesse eust esté restablie en sa ville de Mets, comme elle fut depuis, croyez qu' elle eust taillé prou de besongne à son ennemy. Ce que je vous dis je le tiens en foy & hommage de Gregoire de Tours, qui ne m' est pas un petit parrein, cela estant avenu de son temps. Et neantmoins ne pensez qu' il l' ait espargnee, quand l' occasion s' y est presentee. Qu' ainsi ne soit le Roy Gontran ayant avecques grande ceremonie adopté le Roy Childebert son nepueu, il luy conseilla avant que partir, de ne se fier à la Royne Brunehaud sa mere, comme celle qu' il sçavoit avoir quelques sourdes intelligences avecques Gondebaud son ennemy capital, lequel sous ombre d' une longue chevelure, qu' il ajençoit à la Royale, se maintenoit estre fils du Roy Clotaire premier. C' estoit l' opinion que Gontran avoit lors, vraye ou non, c' est la question: mais il y avoit bien grande apparence du non; n' estant pas à presumer qu' une mere eust voulu favoriser celuy qui luy estoit incogneu, au desavantage de son fils. Joint que je la voy sur ce mesme subject avoir esté depuis calomniee. Car Gondebaut ayant esté mis à mort en la ville de Comminge, on fit depuis entendre à Gontran que Brunehaud avoit fait depuis forger un bouclier d' or massif, enrichy de plusieurs pierres precieuses, pour le donner au fils de Gondebaut. Chose qui mit Gontran en cervelle, & sur ce rapport envoya guettes de toutes parts; mais il trouva en fin de compte, que ce bouclier estoit destiné pour le Roy d' Espagne qui attouchoit Brunehaud de proximité de lignage. Et de fait nonobstant ces pretendus soupçons, elle eut tousjours bonne part aux affaires du Roy Childebert son fils. Elle intervient au traicté de reconciliation qui fut fait entre les deux Roys, & y est establie sous ce titre de Gloriosißima Regina, que je veux rendre en nostre langue Françoise: Tres-grande, & tres-haute Royne: & par le discours du traicté, entre autres particularitez il est dit, qu' advenant que Childebert allast le premier de vie à trespas Gontran prenoit à sa protection Brunehaud mere, Fallenbe femme, & ses enfans. Gilles Evesque de Rheims est degradé des Ordres de Prestrise, privé de son Evesché, & banny, pour avoir conspiré contre la vie de Brunehaud. Bref je ne voy aucun passage en Gregoire de Tours, par lequel il ait grandement suggillé l' honneur & reputation d' elle, depuis son mariage fait avecques Sigebert l' annee 565. jusques au decez de Gontran l' an 597. qui disent trente deux ans. Et depuis ce temps vous trouverez une amitié contractee de sa part avecques sainct Gregoire Pape, qui dura jusques en l' an 604. que ce grand Prelat rendit l' ame à Dieu. Nous voyons seize lettres de luy dedans son Registre (ainsi appelle l' on le livre) diversement esparses à Brunehaud, Childebert, & à ses enfans: mais principalement à la mere.

Or l' air general de toutes ces lettres estoit de haut loüer premierement la pieté de la mere envers Dieu, puis sa sagesse en la conduite de ses enfans, & à eux l' obeïssance filiale qu' ils rendoient à leur mere. Et presque en toutes il les prie de bannir de leurs Royaumes la symonie qui n' estoit que trop familiere aux Eveschez, & de ne permettre que les hommes Laiz, de plein faut, fussent faicts Evesques, sans avoir prealablement passé bien & deüement par les Ordres de Prestrise: Qui estoit en bon langage frapper au mesme lieu où estoit leur mal. Car nos Roys adoncques se donnoient en telles matieres plein ban: tolerans à veüe d' œil la symonie aux Eveschez, voire y ayans quelquesfois part: Et au surplus les conferoient selon leurs grez, le plus du temps à gens Laiz & illetrez, lesquels selon la corruption du siecle prenoient du jour au lendemain les Ordres de Prestrise, & tout aussi tost chargeoient la Mytre & la Crosse d' Evesques. Puisque ce grand sainct homme loüant cette Royne & ses enfans, leur impropera tout franchement les deux fautes que l' on commettoit aux Eglises de leurs Royaumes, je ne me puis faire accroire qu' il eust passé par connivence les vices, que l' on a depuis imputez, avecques une grande largesse à la mere.

Par tout ce que je vous ay cy-dessus discouru, depuis l' an 565. mariage de Brunehaud, jusques en l' an 604. mort de sainct Gregoire, je voy en cette Histoire deux Gregoires: chacun en son endroict grand Prelat, l' un Evesque, l' autre Pape, tous deux canonizez par l' Eglise. Celuy là n' avoit grandement nauré l' honneur de ceste Dame, lequel finit son Histoire de nos Roys au baptesme du Roy Clotaire second qui fut fait l' an cinq cens nonante cinq. Cestuy cy l' avoir celebree comme Princesse sans pair, en matiere de devotion, dont les Eglises par elle basties au Royaume de Bourgongne servoient de bons tiltres & enseignemens. Mais sur tout nulle tache de cruauté remarquee par ces deux Prelats en cette Princesse.

Cela est cause que Papirius Massonius en son Histoire de la France, soustient qu' il falloit, ou que cette Princesse eust esté pleine de grande pieté, ou sainct Gregoire d' impieté, de nous l' avoir par ses lettres pleuvie autre qu' elle n' estoit. Au contraire le docte Cardinal Baronius dict, (sans toutes-fois le nommer: mais on voit bien que c' est luy auquel s' adresse ce pacquet) qu' il se mocquoit de cette opinion: comme s' il n' eust peu advenir que depuis le decez de ce grand Gregoire elle fust depuis tombee en sens reprouvé, & qu' il eust esté garend des fautes par elle du depuis commises. Paroles par lesquelles il recognoist taisiblement qu' il ne la falloit rechercher du passé. Quant à moy tout ainsi que je ne la veux totalement excuser; aussi ne la puis-je totalement accuser. Le tout ainsi que vous pourrez entendre par les particularitez que je discourray cy-apres.

3. 33. Du profit & emolument des Regales qui appartient aujourd'huy aux Tresorier & Chanoines de la saincte Chappelle de Paris.

Du profit & emolument des Regales qui appartient aujourd'huy aux Tresorier & Chanoines de la saincte Chappelle de Paris. 

CHAPITRE XXXIII.

Il ne faut point faire de doute qu' anciennement les fruicts qui provenoient des Eveschez vaquans en Regale estoient estimez, purs Domaniaux. C' est pourquoy par une vieille Ordonnance du premier jour de Mars 1388. il fut expressément ordonné que les deniers qui se recevroient des Regales par les Receveurs particuliers du Domaine, seroient par eux baillez au Changeur du Tresor, qui estoit comme j' ay dit ailleurs, Receveur general du Domaine par toute la France. Et par autre de Charles VI. du 28. de May 1417. il voulut que toutes & quantes fois que les Regales seroient ouvertes, elles fussent gouvernees tant en jurisdiction que recepte: C' est à sçavoir en Jurisdiction ordinaire par les Baillifs, & Seneschaux, & le fait des eauës & forests, par les Maistres des eauës & forests: & les receptes par les Receveurs ordinaires des lieux, esquels s' estendroit la Regale, & defenses faites d' y commettre autres Receveurs par Commission.

La Saincte Chappelle de Paris fut bastie par le Roy sainct Louys, d' une architecture admirable telle que nous pouvons voir. J' ay autrefois ouy dire à Maistre Jacques Androuet, dit du Cerceau, l' un des plus grands architectes qui se soient jamais trouvez en la France, qu' entre tous les bastimens faicts à la moderne, il n' y en avoit point de plus hardy que celuy-là. Appellant bastiments à la moderne comme une Eglise Nostre Dame de Paris & autres tels, qui sur nouveaux desseins furent introduicts depuis le declin de l' Empire de Rome n' ayants riens emprunté de toutes ces parades qui estoient auparavant, telles que celles dont depuis le sieur de Claigny voulut embellir le Louvre, sejour ordinaire de nos Roys dedans la ville de Paris. Or outre ceste architecture je souhaitte que l' on considere les vitres de ce lieu, qui furent faites de telle façon, que les vitriers tiennent pour certain que l' usage & manufacture d' icelles en a esté depuis perdu. Cela soit par moy dit en passant. Long temps apres que S. Louys eust basty ceste Chapelle elle fut depuis grandement annoblie par Charles V. C' est luy qui obtint du S. Siege permission au Tresorier d' icelle d' user de mitre, anneaux & autres ornements pontificaux (excepté de la crosse) & donner benediction tout ainsi qu' un Evesque, celebrant le service divin dedans le pourprix de ceste saincte Chapelle.

Or luy mesmes par lettres du 10. Novembre 1364. ordonna que tous les restes des Comptes seroient destinez pour les reparations tant du Palais que de la saincte Chapelle, commandant par expres que ceste Ordonnance fust enregistree en la Chambre des Comptes, & qu' elle ne peut être enfrainte en quelque terme de paroles qu' il decernast lettres à ce contraires. Or comme ceste saincte Chapelle est vrayement Royalle (Royale) de fondation, aussi nos Rois la voulurent par succession de temps honorer des fruits & emoluments des Regales. Le premier qui l' en gratifia fut Charles VII. non à perpetuité, ains pour trois ans seulement: lesquels estants expirez, il les continua à autres trois ans, par ses patentes du premier de Mars 1452. Le tout pour être employez moytié pour le service divin, & l' autre moytié pour l' entretenement des bastiments & edifices. Et par autres subsequentes du 18. Avril 1458. il leur continua cest octroy pour quatre ans, portants les lettres que le revenu fust receu par ses Receveurs ordinaires plus proches des lieux ou escherroient les Regales, & par eux baillez au Changeur du Tresor, pour être par luy convertis à la refection & reparation des ornements & vestemens de la saincte Chapelle du Palais de Paris, ainsi qu' il seroit par les Seigneurs des Comptes ordonné. Louys XI. soudain apres le decés de son pere, voulant passer outre, par ses lettres du 13. Septembre 1465. leur accorda tant qu' il viuroit le profit des Regales, pour employer la moytié à la continuation du service divin, & l' autre moytié à l' entretenement des ornements, vestements & *linge de l' Eglise, & pour soustenir les vitres d' icelle. Ces lettres presentees à la Chambre elle ne les voulut verifier tout à fait, ains les restraignit à neuf ans, par son Arrest du 6. Novembre 1465. Depuis ce temps on ne fit doute de leur accorder cest octroy, à la vie de chaque Roy: Et de fait quasi par un vœu solemnel tous les successeurs de Louys XI. à leurs avenements octroyerent tous ces proficts tant qu' ils viuroient, & ne fit on doubte à la Chambre d' en verifier les lettres. Charles VIII. par ses patentes du quatriesme Decembre 1483. Louys XII. le second an de son regne le 12. De Juillet 1498. François premier le 18. de Mars 1514. Henry son fils le 2. de Novembre 1547. Jusques à ce que Charles IX. par son Edict de Moulins vingtiesme Fevrier 1565. ordonna que de là en avant tous ces fruicts appartiendroient à perpetuité à la saincte Chapelle. Toutes ces lettres bien & deuëment verifiees en la Chambre des Comptes de Paris: Comme celle qui de tout temps & ancienneté a eu la charge du menage de ce temporel, tout ainsi que le Parlement la cognoissance des differents qui se presentoient pour les Benefices vacquants en Regale. C' est elle qui fait saisir le temporel de l' Evesché vacquant en Regale, elle seule qui en donne main-levee le serment de fidelité fait au Roy par le nouvel Evesque, & qui s' en fait rendre compte pour la conservation des droicts de la Couronne. Il se trouve unes lettres du Roy Philippe le Long du I. Octobre enregistree aux Comptes le XXIX. Octobre 1321. dont l' intitulation est telle, Philippus Dei gratia Francorum & Navarra Rex dilectis & fidelibus nostris gentibus computorum Parisiensium, custodibus Regaliarum nostrarum salutem & dilectionem. Là où il leur mande de bailler main levee à l' Evesque de Paris de son temporel: Parce qu' il avoit esté par luy receu en foy & hommage. Depuis que nos Roys eurent tourné en coustume de donner tant qu' ils regnoient aux Tresorier, Chanoines & Chapitre de la saincte Chapelle les fruicts des Eveschez vacquants en Regale, La Chambre par son Arrest du 12. de Mars 1529. ordonna que les commissions qui seroient de là en avant par elle decernees pour saisir le revenu des Eveschez vacquants en Regale, seroient mises és mains des Tresorier & Chanoines de la saincte Chapelle pour les faire mettre à execution sous le nom du Procureur General de la Chambre: Et ainsi s' est tousjours manié ce mesnage, tellement que combien que la poursuite s' en face à leur diligence, si n' en peuvent-ils accorder la main-levee, ny mesmes chevir & composer par transaction, des fruicts qui leurs appartiennent, sans l' authorité de la Chambre.