Du mot, Abandonner, & de son origine.
CHAPITRE XXXVI.
Entre tous les mots François je trouve cestuy d' abandonner tres-riche & digne d' avoir icy sa maison particuliere. Et certes quiconque entendra l' energie qui fut anciennement en cette diction de Ban, de laquelle j' ay parlé en divers endroits de ces miennes Recherches, pourra par un mesme moyen entendre la vraye source d' abandonner. Ce mot de Ban estoit entre nous par nos plus anciens pratiqué pour une proclamation publique. Dedans Flodoard, parlant du Roy Raoul, Rodulphus interea de Burgundia revertitur in Franciam, & ut se ad bellum contra Normanos praeparent, Francis banno denunciat. Au vieil Coustumier de Normandie chap. 43. L' ost au Prince de Normandie dés le jour qu' il est banny, proroge les querelles. De là vint que nous appellasmes les Annonces qui se font en cas de mariage par les Curez, Bans. Le Maistre des Sentences lib. 4. distinct. 28. Banna sic iure nominari solita, hoc est publicae proclamationes, &c. De là nous disons Ban, quand nous semonnons les vassaux de venir à la guerre, de là est venu Banniere, pour autant qu' un Estendart est comme un signe de retraicte commune des soldats. Et à peu dire, de là est venu le mot que nous recherchons en ce lieu: car comme ainsi soit que ce mot de Ban prist diversité de signifiances, selon la diversité des rencontres, aussi fut-il pris par nos ancestres pour une chose qui estoit publique, ou voüee au public. Et en cette façon disons nous Pressouër bannier, Taureau bannier, de cette mesme fontaine dirent nos ancestres donner une chose à Ban, pour dire qu' ils l' exposoient à la discretion du public, ainsi que nous voyons estre pratiqué en termes du tout formels au mesme grand Coustumier de Normandie, au tiltre de Banon, & deffens. Où il appelle le temps de Banon, auquel les bestes peuvent aller par les champs pasturer communément, & sans pasteur: & les terres en deffens, ausquelles il n' est permis y aller: Vuides terres sont en deffens, (dit le lieu) depuis la my-Mars jusques à la S. Croix en Septembre. En autre temps elles sont communes, s' elles ne sont closes ou defenduës d' ancienneté si comme de hayes Banon doit estre ostee de toutes terres, en quoy la blee est apparoissant qui pourroit en estre empiree. Qui nous apprend que de trois dictions Françoises qui estoient A Ban donner, nous en avons fait une seule que nous disons Abandonner, de laquelle nous usons à l' endroit de toutes choses que nous voyons estre prostituees à la mercy d' uns & autres.
