10. 8. Diverses leçons en l' Histoire de la Royne Brunehaud, Gregoire de Tours, S. Gregoire Pape.

Diverses leçons en l' Histoire de la Royne Brunehaud, avecques un sommaire discours de ce qu' on trouve à son advantage, tant dedans Gregoire de Tours, que S. Gregoire Pape.

CHAPITRE VIII.

Apres vous avoir discouru & justifié ce que je pense veritable en l' histoire de Fredegonde, je viens maintenant à celle de Brunehaud: En laquelle je supplie le Lecteur s' armer de patience, jusques à la closture de mon compte, me promettant que pour fin de jeu il y trouvera matiere pour se contenter. Jamais lignee ne fut affligee de telle façon comme celle de Brunehaud par la famille de Fredegonde. Galsonde sa sœur aisnee deuxiesme femme de Chilperic, estranglee dedans son lict, Sigebert son mary assassiné, Childebert fils de luy empoisonné, le tout par les artifices de Fredegonde. Et apres son decez les enfans de Theodoric fils de Childebert occis, & leurs Royaumes empietez par Clotaire fils de Fredegonde; & finalement Brunehaud cruellement mise à mort. Grandes certes, & merveilleuses afflictions: mais cette-cy paravanture non moindre, qu' apres la mort espouventable de cette Princesse, le battu a payé l' amende. Car la plus part des plus anciens Autheurs, qui depuis Gregoire de Tours ont escrit nostre histoire, luy imputent tous les malheurs qui lors, & auparavant estoient advenus en la France, & la publient pour la plus furieuse Megere, qu' oncques comparut sur la face de la terre. Ce que j' oze attribuer, non tant à la verité de l' histoire, qu' au bon-heur du Roy Clotaire son ennemy, pour excuser l' inhumanité barbaresque dont il la traicta à sa mort. Et qui est encore plus esmerveillable, c' est que si cette Royne fut cause pendant sa vie de plusieurs guerres, & divisions entre les Roys Theodebert & Theodoric ses petits enfans, ainsi que le porte la commune leçon, elle n' excita pas moins de partialitez entre ceux qui escrivirent sa vie. Uns Fredegaire, Aimoïn, Gaguin & Gilles, du tout voüez à mesdire d' elle: Au contraire nostre gentil Paule Aemile, & du Tillet Evesque de Meaux à l' excuser, & soustenir que la plus part de ce que les anciens en avoient mesdit estoit faux. Il n' est pas qu' entre ceux qui de plus fraische memoire ont mis la main à la plume, il n' y ait pareilles partialitez. Car Pierre Masson, qui par un nom emprunté de Tite Live, s' est appellé Papirius Massonius, & apres luy Jean Mariana Espagnol sont formellement pour le dernier party: Contre lesquels Haillan, Veignier, Belle-forest, Serre & Fauchet sont pour le premier. Je donne cet ordre à ces cinq, non sur le poids de leurs merites; ains selon qu' ils mirent leurs œuvres en lumiere: Quant à moy sans m' arrester à ceux-cy, desquels toutesfois j' entens parler avecques tout honneur, je me delibere de deduire par ce Chapitre, tout ce que j' ay trouvé de bon & mal d' elle dedans deux Autheurs qui sont sans reproche, pour avoir vescu pendant la vie de cette Princesse.

Le premier que je voy en avoir parlé est Gregoire Evesque de Tours, quand il dit que Sigebert Roy d' Austrasie, plus sage que ses trois autres freres qui s' adonnoient à amours lubriques, rechercha en mariage Brunehaud fille d' Athanaïlde Roy d' Espagne. Erat enim puella elegans opere, venusta aspectu, honesta moribus, atque decora, prudens consilio, & blanda colloquio. Car elle estoit (fait-il) accompagnee d' une bien-seance en ses actions, belle à qui la regardoit, bien morigenee, sage en ses conseils, & d' un doux entregent. Cela mesme est confirmé par Fortunat Evesque de Poictiers l' un des premiers Poëtes de son temps, quand au 6. livre de sa Poësie parlant d' elle il dit.

Pulchra, modesta, decens, solers & grata, benigna, 

Ingenio, vultu, nobilitate potens.

Et ayant esté cette Princesse de cette façon depeinte par Gregoire, il dit que apres avoir esté catechisee, & espousé la Religion Catholique, au lieu de l' Arrienne en laquelle elle avoit esté nourrie en Espagne chez son pere, le Roy Sigebert tout d' une suite l' espousa. Et tant & si longuement que ce Roy vesquit, je ne voy dedans Gregoire, qu' il soit parlé en bien ou en mal d' elle. Qui ne luy est pas un petit honneur: Car à bien dire la femme n' est peu honoree, qui sans mettre ses deportemens à l' essor, reduit toutes ses volontez à la volonté de son mary. Soudain apres le decez de luy, je la voy mise sur les rangs en deux actes: L' un quand advertie de cette mort inopinee, elle fait sortir de nuict à petit bruit sur les murailles de la ville dedans une corbeille, Childebert son fils; lequel par l' entremise du Capitaine Gondebaud, fut conduit à Mets, & couronné Roy d' Austrasie, aagé seulement de cinq ans: L' autre quand Chilperic insolent en sa bonne fortune, advenuë de l' assassinat commis en la personne de Sigebert, confina cette Princesse en la ville de Rouen, pour y terminer ses jours; où elle espousa quelque peu apres Meroüee, fils aisné de Chilperic. Le premier fut un acte de bonne & sage mere: Le second fut conduit par deux ames aveuglees de passions, l' une de l' amour en Meroüee, l' autre de la vangeance en Brunehaud. Car si ce mariage luy eust reüssi suivant son souhait, c' eust esté un admirable traict de vangeance digne d' estre trompeté dedans une longue posterité, se vangeant de la mort de son mary, par le fils contre le pere son ennemy. Mais il y eut tres-grande faute de prudence: D' autant que le lieu où le mariage se fit estoit sujet au Roy victorieux, & le peu de gens de main qu' ils avoient pour leur faire espaule, les devoit destourner de cette entreprise, comme l' evenement leur monstra. Que s' ils l' eussent differee jusques à ce que cette Princesse eust esté restablie en sa ville de Mets, comme elle fut depuis, croyez qu' elle eust taillé prou de besongne à son ennemy. Ce que je vous dis je le tiens en foy & hommage de Gregoire de Tours, qui ne m' est pas un petit parrein, cela estant avenu de son temps. Et neantmoins ne pensez qu' il l' ait espargnee, quand l' occasion s' y est presentee. Qu' ainsi ne soit le Roy Gontran ayant avecques grande ceremonie adopté le Roy Childebert son nepueu, il luy conseilla avant que partir, de ne se fier à la Royne Brunehaud sa mere, comme celle qu' il sçavoit avoir quelques sourdes intelligences avecques Gondebaud son ennemy capital, lequel sous ombre d' une longue chevelure, qu' il ajençoit à la Royale, se maintenoit estre fils du Roy Clotaire premier. C' estoit l' opinion que Gontran avoit lors, vraye ou non, c' est la question: mais il y avoit bien grande apparence du non; n' estant pas à presumer qu' une mere eust voulu favoriser celuy qui luy estoit incogneu, au desavantage de son fils. Joint que je la voy sur ce mesme subject avoir esté depuis calomniee. Car Gondebaut ayant esté mis à mort en la ville de Comminge, on fit depuis entendre à Gontran que Brunehaud avoit fait depuis forger un bouclier d' or massif, enrichy de plusieurs pierres precieuses, pour le donner au fils de Gondebaut. Chose qui mit Gontran en cervelle, & sur ce rapport envoya guettes de toutes parts; mais il trouva en fin de compte, que ce bouclier estoit destiné pour le Roy d' Espagne qui attouchoit Brunehaud de proximité de lignage. Et de fait nonobstant ces pretendus soupçons, elle eut tousjours bonne part aux affaires du Roy Childebert son fils. Elle intervient au traicté de reconciliation qui fut fait entre les deux Roys, & y est establie sous ce titre de Gloriosißima Regina, que je veux rendre en nostre langue Françoise: Tres-grande, & tres-haute Royne: & par le discours du traicté, entre autres particularitez il est dit, qu' advenant que Childebert allast le premier de vie à trespas Gontran prenoit à sa protection Brunehaud mere, Fallenbe femme, & ses enfans. Gilles Evesque de Rheims est degradé des Ordres de Prestrise, privé de son Evesché, & banny, pour avoir conspiré contre la vie de Brunehaud. Bref je ne voy aucun passage en Gregoire de Tours, par lequel il ait grandement suggillé l' honneur & reputation d' elle, depuis son mariage fait avecques Sigebert l' annee 565. jusques au decez de Gontran l' an 597. qui disent trente deux ans. Et depuis ce temps vous trouverez une amitié contractee de sa part avecques sainct Gregoire Pape, qui dura jusques en l' an 604. que ce grand Prelat rendit l' ame à Dieu. Nous voyons seize lettres de luy dedans son Registre (ainsi appelle l' on le livre) diversement esparses à Brunehaud, Childebert, & à ses enfans: mais principalement à la mere.

Or l' air general de toutes ces lettres estoit de haut loüer premierement la pieté de la mere envers Dieu, puis sa sagesse en la conduite de ses enfans, & à eux l' obeïssance filiale qu' ils rendoient à leur mere. Et presque en toutes il les prie de bannir de leurs Royaumes la symonie qui n' estoit que trop familiere aux Eveschez, & de ne permettre que les hommes Laiz, de plein faut, fussent faicts Evesques, sans avoir prealablement passé bien & deüement par les Ordres de Prestrise: Qui estoit en bon langage frapper au mesme lieu où estoit leur mal. Car nos Roys adoncques se donnoient en telles matieres plein ban: tolerans à veüe d' œil la symonie aux Eveschez, voire y ayans quelquesfois part: Et au surplus les conferoient selon leurs grez, le plus du temps à gens Laiz & illetrez, lesquels selon la corruption du siecle prenoient du jour au lendemain les Ordres de Prestrise, & tout aussi tost chargeoient la Mytre & la Crosse d' Evesques. Puisque ce grand sainct homme loüant cette Royne & ses enfans, leur impropera tout franchement les deux fautes que l' on commettoit aux Eglises de leurs Royaumes, je ne me puis faire accroire qu' il eust passé par connivence les vices, que l' on a depuis imputez, avecques une grande largesse à la mere.

Par tout ce que je vous ay cy-dessus discouru, depuis l' an 565. mariage de Brunehaud, jusques en l' an 604. mort de sainct Gregoire, je voy en cette Histoire deux Gregoires: chacun en son endroict grand Prelat, l' un Evesque, l' autre Pape, tous deux canonizez par l' Eglise. Celuy là n' avoit grandement nauré l' honneur de ceste Dame, lequel finit son Histoire de nos Roys au baptesme du Roy Clotaire second qui fut fait l' an cinq cens nonante cinq. Cestuy cy l' avoir celebree comme Princesse sans pair, en matiere de devotion, dont les Eglises par elle basties au Royaume de Bourgongne servoient de bons tiltres & enseignemens. Mais sur tout nulle tache de cruauté remarquee par ces deux Prelats en cette Princesse.

Cela est cause que Papirius Massonius en son Histoire de la France, soustient qu' il falloit, ou que cette Princesse eust esté pleine de grande pieté, ou sainct Gregoire d' impieté, de nous l' avoir par ses lettres pleuvie autre qu' elle n' estoit. Au contraire le docte Cardinal Baronius dict, (sans toutes-fois le nommer: mais on voit bien que c' est luy auquel s' adresse ce pacquet) qu' il se mocquoit de cette opinion: comme s' il n' eust peu advenir que depuis le decez de ce grand Gregoire elle fust depuis tombee en sens reprouvé, & qu' il eust esté garend des fautes par elle du depuis commises. Paroles par lesquelles il recognoist taisiblement qu' il ne la falloit rechercher du passé. Quant à moy tout ainsi que je ne la veux totalement excuser; aussi ne la puis-je totalement accuser. Le tout ainsi que vous pourrez entendre par les particularitez que je discourray cy-apres.

6. 22. Quelles courtoisies receut le Capitaine Bayard non seulement des François, mais aussi de ses ennemys, avecques un sommaire discours de sa mort.

Quelles courtoisies receut le Capitaine Bayard non seulement des François, mais aussi de ses ennemys, avecques un sommaire discours de sa mort.

CHAPITRE XXII.

Comme Dieu avoit produit Bayard pour estre un parangon de Chevalerie, accompagné de toutes sortes de vertus, qui le fit aimer successivement de trois Roys qu' il servit, Charles VIII. Louys XII. & François I. & honorer de toute la gendarmerie Françoise, par dessus tous les autres grands Capitaines & guerriers, aussi eut il cette particuliere benediction de Dieu, d' estre non seulement craint & redouté de ses ennemis, mais aussi aimé tant durant sa vie, qu' apres sa mort: Chose dont je vous raconteray deux traits qui ne meritent de mourir avecques luy.

Ludovic Sforce ayant esté chassé du Milannois, par nostre Roy Louys XII. & fait sa retraicte en Allemagne, il trouva moyen tant par amis, qu' argent, de mettre nouvelle armee en avant: & y besongna si bien qu' en peu de temps il fut restably. Comme le Roy se preparoit pour passer les monts, la fortune avoit voulu que Bayard fust dés long temps au paravant demeuré en garnison, avec quelques braves cavaliers François en la Lombardie. Lequel ayant eu advis que dedans Bivas y avoit trois cens chevaux qui seroient aisez à deffaire, pria ses compagnons de vouloir battre les chemins avec luy: ce dont il ne fut esconduit: Et se mirent cinquante ou soixante de compagnie, tous gens lestes, bien deliberez de mettre quelque belle entreprise à chef. Messire Jean Bernardin Carache brave Capitaine, commandoit à la ville de Bivas, lequel ayant eu advis par ses espions de cette saillie, se mit aux champs, en bonne deliberation de leur donner la muse. A l' aborder y eut d' une part & d' autre une tres-perilleuse charge: & dura cet estour quelque temps sans que l' on eust sceu juger vers qui balançoit la victoire. Qui occasionna le Capitaine Bayard d' exhorter les siens à y coucher de leurs restes, lesquels donnerent de telle furie, que les Lombards, ou par ruse, ou crainte, feignans de parer aux coups, se retiroient peu à peu pres de la ville de Milan, de laquelle se voyans non grandement esloignez, tournerent tout à coup visage, & à toute bride entrerent dedans la ville, suivis de nos trouppes Françoises jusques bien pres des murailles: & lors fut crié par l' un des plus anciens des nostres. Tournez hommes d' armes, tournez. A quoy chacun obeït, fors Bayard, qui comme un Lyon entra peslemesle au milieu d' eux, les chassant, jusques devant le Palais du seigneur Ludovic. Là environné de l' ennemy, & sagement abandonné par les siens, il fut pris par Jean Bernardin, & mené en son logis, où il le fit desarmer, qui le trouva fort jeune Gentil-homme, comme de vingt & deux à vingt & trois ans, dont il s' esmerveilla, mesmement comme il estoit possible que tel aage portast tant de proüesse qu' il avoit recognuë en luy. Ludovic ayant entendu comme le tout s' estoit passé, & specialement luy ayant esté fait grand estat de la vaillance & magnanimité de ce jeune Gentilhomme prisonnier, commanda qu' il luy fust amené le lendemain: ce qui fut fait par Bernardin non moins courtois que bon guerrier, l' ayant revestu de l' une de ses robbes, & mis en ordre de Gentilhomme, le vint luy mesme presenter au seigneur, lequel s' en esbahit infiniment, & adressant vers luy sa parole: Venez ça (luy dit-il) mon Gentilhomme, qui vous amene en cette ville? Par ma foy monseigneur (respondit Bayard) je n' y pensois pas entrer tout seul, & estimois estre suivy de mes compagnons, mais ils ont mieux entendu la guerre que moy: Parce que s' ils eussent fait ainsi que j' ay fait, ils fussent comme moy prisonniers. Toutesfois je me louë de mon infortune qui m' a fait tomber entre les mains d' un si bon maistre, que celuy qui me tient. Car c' est un tres-vaillant & avisé Chevalier: Ainsi tombans de l' un à l' autre propos, Ludovic s' informa de luy quelle estoit l' armee Françoise, & de combien d' hommes composee. A quoy le Chevalier luy respondit, qu' il y avoit quatorze ou quinze cens hommes d' armes, & dix-huict mille hommes de pied, tous gens d' eslite, qui se promettoient d' asseurer à cette fois l' Estat de Milan au Roy leur maistre. Et me semble monseigneur, que seriez bien en aussi grande seurté en Allemagne au large, que d' estre icy à l' estroit, vos gens n' estans pas suffisans de nous faire teste. Parlant le Chevalier d' une telle asseurance, que le Seigneur prenoit plaisir á l' ouyr, ores qu' il y eust suject en son dire de l' estonner: mais pour faire paroistre qu' il ne s' en soucioit, luy repliqua: Sur ma foy mon Gentilhomme je souhaite que nos armees se joignent: A fin que par la decision d' une bataille on puisse cognoistre à qui de droit appartient cet heritage: car je n' y voy point d' autre moyen. Par mon serment (repartit le Bayard) je voudrois monseigneur que ce fust dés demain: pourveu que je fusse hors de prison. Vrayement à cela (repliqua le Seigneur Ludovic) ne tiendra-il, car je vous en mets dehors presentement, & cheviray avec vostre maistre: Demandez moy ce que voudrez & je le vous donneray. Bayard le genoüil en terre l' en remercia, luy disant monseigneur, je ne vous demande autre chose sinon que si vostre courtoisie se vouloit tant estendre, que de me faire rendre mon cheval, & mes armes, & me renvoyer ainsi devers ma garnison qui est à vingt mille de cette ville, m' obligeriez tant à vous, que horsmis le service de mon Roy, & mon honneur sauf, j' exposerois ma vie pour vous, quand il vous plairoit me le commander. En bonne foy (dist le Seigneur) vous avrez presentement ce que demandez. Et commanda à Bernardin que promptement on luy rendist son cheval, armes, & tout son fait: A quoy ayant obeï Bayard s' arma, monta sur son cheval sans mettre le pied à l' estrié, puis demanda une lance, qui luy fut baillee. Et levant sa veuë dist à Ludovic. Monseigneur je vous remercie humblement de la courtoisie qu' il vous a pleu me faire: Dieu vous la vueille rendre. Il estoit en une grande cour, & lors commença de donner l' esperon au cheval, lequel fit quatre ou cinq sauts, tant gaillardement, qu' impossible seroit de mieux, & puis luy donna une petite course, en laquelle il rompit sa lance contre terre en cinq ou six pieces. Dont Ludovic ne s' esjouït pas trop, & dit tout haut. Si tous les hommes d' armes de France estoient pareils à cettuy, ce me seroit un mauvais party: Puis luy fit bailler un Trompette, pour le conduire en sa garnison. Voila comment une hardiesse imprudente au fait des armes fit prendre Bayard prisonnier, & comme une sage hardiesse de parler luy moyenna sa liberté. Mais je vous prie dictes moy quelle fut plus grande la hardiesse du Chevalier, ou la courtoisie du Seigneur Ludovic.

Bien vous diray-je que depuis la proüesse faisant son perpetuel sejour en ce guerrier, il aprist avec le temps d' apporter de la temperance, & sagesse, dont il acquist telle reputation qu' apres sa mort encores fut-il honoré par nos ennemis: Nul n' avoit rendu plus de devoir contre l' Espagnol que luy, fust en particulier ou en general: Tesmoing le combat qu' il eut en camp clos contre Alonce de Sotto Maiore, brave Capitaine au Royaume de Naples, qu' il mist à mort, ores qu' il fust lors affligé d' une fievre quarte, tesmoing le combat de treize Espagnols, contre treize François, où il fit tant d' armes qu' unze des siens ayans perdu leurs chevaux, luy second d' un autre Cavalier mist en route les Espagnols. Tesmoing la garde du pont faicte par luy seul avec sa picque, contre deux cens Espagnols, en attendant le secours de ses compagnons. Tesmoing la ville de Maiziere qu' il reserva au Roy François premier, contre toutes les forces de l' Empereur Charles V. par une sagesse admirable, & autres infinis, braves & sages exploicts d' armes, qui le rendirent craint, aimé, & honoré, voire par les mesmes Espagnols, qui de leur naturel sont sobres admirateurs d' autruy. Il avoit accoustumé, comme j' ay dit ailleurs, d' estre tousjours à la pointe quand il falloit entrer au combat, & ce pour donner courage aux siens, & en cas de retraicte, estoit derriere, comme le berger apres son troupeau, pour soustenir les efforts de l' ennemy qui se pouvoient presenter. Ainsi qu' il fit lors que l' Admiral de Bonivet, Lieutenant general du Roy en la Lombardie, y faisant mal ses affaires, fit estat de retourner à la France avec son Ost. Où le Chevalier asseuré comme s' il eust esté enclos de murailles, faisant marcher ses gendarmes, & tournant tantost le visage vers l' ennemy, tantost suivant à petit pas nostre armee, il fut salvé d' un coup d' harquebuze à croc, qui luy rompit le gros os de l' eschine. On dit en commun proverbe que telle vie, telle mort, ce qui se trouva lors en ce brave guerrier: car aussi tost il s' escria. Helas mon Dieu: je suis mort, & prenant son espee par la poignee, baisa la croisee en signe de la Croix, avec cette humble Oraison à Dieu. Miserere mei Deus secundum magnam misericordiam tuam: Sentant les forces de son corps defaillir en luy, toutesfois d' un esprit fort qui ne l' avoit abandonné, il commanda à un sien maistre d' hostel de le descendre de son cheval, & le coucher au pied d' un arbre le visage devers l' ennemy.

Les nouvelles de sa blesseure s' espandirent tout aussi tost en l' armee Espagnole: Au moyen dequoy le Marquis de Marignan, qui secondoit en cette escarmouche le Seigneur de Laulnoy, Lieutenant general de l' Empereur, le vint voir, & avec une larme à l' œil luy dist, qu' encores qu' en sa mort l' Empereur son maistre fist un gain inestimable, toutesfois qu' il voudroit avoir racheté sa vie d' une grande partie de son bien, voire de son propre sang. Et est chose qui merite d' estre racontee: Car tout ainsi que l' emploite de sa vie luy estoit heureusement reüssie pour le service de trois Roys ses maistres, aussi luy advint-il le semblable à sa mort. D' autant que les Espagnols ayans eu advis de son infortune, soit qu' ils fussent desireux de l' envisager avant son decez, ou qu' ils pensassent avoir obtenu pleine victoire par sa disgrace, ou bien tous les deux ensemble, laisserent la poursuite qu' ils faisoient contre les nostres, leurs permettans de retrouver leurs anciennes brisees de France sans destourbier: Et lors le visiterent à la foule, comme en une procession, disant en leur langage, Mouches, Grisonnes, & paucos Bayardos. Son maistre d' hostel qui ne l' abandonna, le voulut faire transporter de dessous l' arbre en quelque cassine prochaine, mais il ne le voulut permettre pour les douleurs qu' il sentoit estant remué. Qui fut cause que les Espagnols luy firent tendre en ce lieu un riche pavillon, & un lict de camp, sur lequel il fut couché, & apres avoir esté confessé par un homme d' Eglise & visité par le commun de l' armee, regretté & consolé par les plus grands, il rendit l' ame à Dieu. Son corps fut porté avec tout honneur en l' Eglise, où luy furent faites ses obseques l' espace de deux jours, & depuis rendu à ses gens, qui le firent transporter en Dauphiné, où il avoit pris sa naissance, & dont il estoit lors gouverneur, & y fut inhumé par le Parlement, avec telle ceremonie, que meritoient sa valeur, & sa dignité. Et à la mienne volonté que luy voulant icy redonner la vie à demy ensevelie par l' ingratitude des ans, il la donne pareillement à ce mien œuvre, par le plaisir que le Lecteur pourra recevoir en voyant quelques marqueterie de son histoire.

10. 14. Autres, tant cruautez que amourettes, imputees à Brunehaud sur sa vieillesse.

Autres, tant cruautez que amourettes, imputees à Brunehaud sur sa vieillesse.

CHAPITRE XIV.

On adjouste à tout ce que dessus que cette Princesse fit tuer Brafile Patrice, de sens froid, & non pour autre cause, que pour s' accommoder de ses biens par forme de confiscation. En passant plus outre on dit, que Didier Evesque de Vienne, Prelat de saincte conversation, apres avoir esté envoyé en exil par elle, & depuis revoqué; toutesfois elle donna ordre qu' il fust furieusement lapidé apres son retour. Au moyen dequoy apres sa mort, comme Martyr, on le colloqua au Catalogue des Saincts. Et depuis ces detestables cruautez, on saute sur ses nouvelles amours.

Grande pitié certes! que cette Dame, qui pendant ses Prime-vere, Esté, & Automne, avoit mené une vie devote, ou bien hypocrisé une longue devotion, eust dedans son Hyver logé une paillardise chez soy, s' estant donné pour mignon de couche Protade Gentil-homme Romain, qu' elle avança aux honneurs, voire le fit pourvoir de la Mairie du Palais, apres la mort du grand Capitaine Bertoulde. Protade dis-je vrayment industrieux, mais qui se rendoit infiniment odieux pour deux vices: L' un en inventant plusieurs nouvelles daces, par le moyen desquelles faisant contenance de favoriser les affaires du Roy son Maistre, il s' enrichissoit grandement de la despoüille du pauvre peuple: L' autre, que s' estant faict grand & puissant, par la faveur de la Royne, il vilipendoit, & faisoit litiere de la Noblesse Bourguignonne. Vices qui luy causerent sa mort à la maniere qu' entendrez. Theodoric par un nouveau dessein, ou bien desir de s' agrandir contre son frere, s' estant armé, & Protade par une flatterie de Cour, inclinant à cette opinion, contre l' advis general des autres Seigneurs, il fut par eux advisé qu' il valoit beaucoup mieux amortir ce feu par la mort d' un seul homme, que d' exposer les vies de tant de gens de bien au hazard d' une bataille. Quoy faisant c' estoit en plein champ joüer, comme sur une table à un coup de dé, la grandeur dee (sic) l' un & l' autre freres. Suivant cette resolution plusieurs gens d' armes & soldats se presentent devant la tente du Roy, dedans laquelle Protade joüoit aux dames, en bonne deliberation de le tüer. Chose dont le Roy estonné commanda tout aussi tost à Unselen l' un des premiers Seigneurs de Bourgongne, de leur faire inhibitions & deffences de sa part de passer outre, sur peine de la hard. Mais luy qui estoit de la partie, leur dit qu' il avoit charge du Roy de leur commander de mettre Protade à mort. Aussi tost dit, aussi tost fait & executé. Mort qui depuis luy fut cher venduë; car par sentence renduë, à la poursuite de Brunehaud, comme l' on dit, il fut rendu impuissant de ses mains, & pieds, & tous & un chacun ses biens declarez acquis & confisquez au Roy: Et Volfe qui l' avoit secondé en cette entreprise condamné à mort, laissant à celuy là qui avoit plus forfait une miserable & penible vie, pour porter une plus longue penitence de sa forfaicture; & à l' autre une plus courte par sa mort. En tout cecy il n' y a rien de cruauté: car ce furent deux punitions exemplaires qu' on prenoit de deux Seigneurs pour leurs demerites. Deslors comme j' ay dit au chapitre precedant, se rompit l' armee, & depuis ne fut propos d' aucune guerre entre les deux freres, jusques au temps par moy cy-dessus touché. Qui monstre (je diray cecy en passant, joinct ce que j' ay deduit cy-dessus) que quand depuis ils combattirent, il n' estoit plus question de la fable du fils de jardinier. Pareillement je ne voy dedans les histoires mesdisantes, nouvelles amours estre entrees au cœur de cette Princesse. Mais faut noter qu' elle tolera que Theodoric son fils se plongea toute sa jeunesse dedans la paillardise; ayant eu quatre enfans bastards, Sigebert, Childebert, Corbe, & Meroüee, de quatre diverses concubines, tant le change luy estoit agreable. Il y a plus: car du depuis le Roy par un taisible remords de sa conscience, ayant espousé l' Infante Hermemberge, fille de Berrich Roy d' Espagne, Brunehaud ne pouvant endurer une corrivale de sa grandeur par un nouveau mariage, besongna de telle façon par charmes & sorcelleries, qu' elle empescha la cohabitation maritale de luy avecques sa femme: Au moyen dequoy il la renvoya vers son pere dedans l' an de la benediction nuptiale: qui estoit un grand preparatif de guerres, si le pere n' eust esté prevenu de mort. Trompetez les meschancetez de Brunehaud tout ainsi qu' il vous plaira, quant à moy je pense cette-cy estre l' outrepasse des autres. Car Theodoric retourna sur ses premiers arrhemens de folie, perdant, & ame, & corps, & reputation tout ensemble envers tout le monde. Cela estoit veu & consideré d' un chacun, & specialement par le bon pere Colombain, qui dedans sa vie solitaire nourrissoit une singuliere liberté d' esprit. C' est pourquoy il se transporta deux fois devers eux, & d' une admirable liberté, leur remonstra que le Roy perdant son ame de cette façon, perdroit par un mesme moyen son Royaume. Et combien que ces sainctes remonstrances se deussent tourner en edification; toutesfois Brunehaud endurcie en son peché, les revoquant en injures, ne cessa de là en avant, jusques à ce que ce sainct homme eust esté tout à fait banny & exterminé du Royaume de Bourgongne. Mais parce que cette histoire est d' une plus longue haleine, & qu' en voulant accuser cette Dame du tort que contre Dieu & raison elle pourchassa à ce grand S. homme, j' entens tout d' une main l' excuser de plusieurs autres crimes que on luy impropere. Je remettray la decision de ce differant à l' autre chapitre que je ne veux attribuer à ma plume; ains à celle de Fredegaire, pour avoir pris de luy le trente-sixiesme chapitre de son livre, & rendu François, tant pour l' estoffe de la bonne vie de Colombain sainct homme, que pour la consequence que j' en veux tirer en faveur de Brunehaud.

10. 19. Procedures extraordinaires inexcusables, & faicts calomnieux, sur lesquels la Royne Brunehaud fut exposee à un impiteux supplice.

Procedures extraordinaires inexcusables, & faicts calomnieux, sur lesquels la Royne Brunehaud fut exposee à un impiteux supplice.

CHAPITRE XIX.

He vrayment! il ne faut trouver estrange, que la memoire de cette Princesse eust esté de cette façon deschiree, sur faits calomnieusement controuvez contr'elle apres sa mort, veu que dés son vivant elle ne se peut exempter d' autres calomnies, sur lesquelles elle fut condamnee à mort, & son corps cruellement mis en pieces. Histoire que je recueille de Fredegaire & Aimoïn, Autheurs souvent par moy cy-dessus alleguez, qui est le subject de ce present chapitre.

Le Roy Theodoric allant de vie à trespas delaissa quatre enfans qu' il avoit eus de quatre concubines, Sigebert, Childebert, Corbe, Meroüee, & avecques eux la Royne Brunehaud son ayeule. Apres le decez de luy, le Roy Clotaire s' estant emparé des Royaumes de Bourgongne, & d' Austrasie, & de la bisayeule, & de trois des arriere-petits enfans: le tout par la trahison de Garnier Maire du Palais de Bourgongne; lesquels luy ayans esté presentez, il fit soudain mettre à mort Sigebert & Corbe, devant les yeux de leur bisayeule, & au regard de Meroüee qu' il avoit tenu sur les fonts baptismaux, luy sauva la vie en consideration de cette filiation spirituelle, & le bailla en garde à un sien Secretaire, toutesfois depuis ce temps je ne voy ny voix, ny vent de luy dedans nos Histoires, non plus que de Childebert second fils, qui auparavant s' estoit garanty par la fuite sur un fort destrié. Non content de cette belle emploite il fit sommairement & de plain le procez extraordinaire à la Royne Brunehaud, sur dix chefs d' accusation qui furent contre elle proposez par ses ennemis. C' est à sçavoir qu' elle avoit fait mourir, quoy que soit esté cause de la mort de dix Roys: Entendans sous ce mot, non qu' ils fussent tous qualifiez Roys, mais bien les uns estans Roys, & les autres extraicts de sang Royal; C' est à sçavoir Sigebert son mary, Meroüee & Chilperic son pere, un autre Meroüee fils du Roy Clotaire, Theodebert, & son fils Clotaire, Theodoric, & ses trois enfans (ainsi sont ils, & de tel ordre denombrez par Fredegaire, car quant à Aimoïn, encore qu' en gros il face mention de dix Roys; toutesfois il ne les particularize, se contentant d' aigrir l' affaire par la Rhetorique claustrale, en quelques uns des Roys dont il parle.) Sur ces accusations le Roy du jour au lendemain la condamne en son Conseil, d' estre par trois jours tourmentee en sa personne à huis clos, puis conduite sur un chameau par tout le camp,  non tant a fin que son armee fust spectatrice de sa misere, que pour luy servir en sa misere d' opprobre, mocquerie & illusion. Et finalement qu' elle fust attachee par les bras & cheveux à la queuë d' un cheval fougueux, & trainee par les voiries, jusques à la fin de sa vie. Ainsi jugé, & aussi tost en tout & par tout executé: & cette Princesse ainsi liee, au premier coup d' esperon donné au cheval, elle eut la teste ecervelee, & de là sans conduite de frain, trainee par halliers, hayes, buissons, broussailles & rochers, son corps deschiré & mis en pieces de telle sorte, qu' à peine en resta-il la carcasse.

Cette Histoire a esté par succession de temps, & de main en main representee, non seulement par les nostres; ains reblandie, comme ayant esté pris un juste supplice de cette Dame: Et de moy je l' estime la plus honteuse, inhumaine, & detestable, qui fut jamais couchee sur le papier. Si Clotaire l' eust fait passer par le fil de l' espee, comme ses arriere-petits enfans, peut estre y avroit il excuse comme d' une mort d' Estat, je veux dire comme de celle par laquelle, selon le monde, il voulust asseurer de tout poinct l' Estat par luy de nouveau conquis: Mais de l' avoir voulu revestir d' un faux pretexte de Justice, je dis & soustiens que ce fut non seulement violer le droict de gens & des armes; ains tout droit divin & humain, de quelque façon qu' il vous plaise mesnager cette Histoire. Premierement à qui est fait le procez? A une Royne & Princesse souveraine: Doncques non justiciable de celuy entre le mains duquel elle estoit tombee. Partant devoit son malheur aboutir, ou à une rançon seulement, ou bien à une longue prison, & detention de sa personne, ou en tout evenement à une mort, mais non cruelle, & exemplaire, comme cette-cy. Par qui est fait ce procez? non seulement par celuy qui estoit le juge, ains la partie; car pour tel vous est-il figuré par Aimoïn, quand il en parle. Sur quoy estoit l' accusation fondee? sur dix morts de Roys. Paravanture furent tous les chefs de cette accusation averez? Rien moins: mais aussi tost proposez: aussi tost la Princesse exposee à mort. Et qui est chose pleine d' une compassion admirable, non seulement ils ne furent averez; ains au contraire la calomnie s' y voit à l' œil: car quant à ce qu' en premier lieu on luy objecta, qu' elle estoit cause de la mort du Roy Sigebert son mary, comme l' ayant induit à la guerre contre le Roy Chilperic son frere; qui avroit occasionné l' assassinat depuis advenu en sa personne, c' est un vray songe & fantosme. Parce qu' en toute l' Histoire de Gregoire vous ne trouverez estre parlé d' elle depuis son mariage, sinon lors qu' advertie de la mort du Roy son mary, elle fit sagement evader de Paris le jeune Roy Childebert son fils. Et au surplus, le mesme Autheur nous enseigne que Chilperic fut le premier boute-feu de leurs guerres. Jusques à ce qu' en fin ce grand guerrier Sigebert fut assassiné par les embusches de Fredegonde, comme nous avons plus amplement discouru ailleurs; Et neantmoins voila le premier mets de son accusation dont on nous repaist, pour rendre l' innocence de cette pauvre Princesse inexpiable, pour avoir fait mourir son mary. Vous pourrez par cela juger quel est le demeurant du service. On luy objecte en second lieu la mort de Meroüee fils aisné du Roy Chilperic. Je vous ay cy-dessus recogneu, & encore recognois franchement, que pour se vanger de la mort du Roy son mary, elle espousa le fils de son ennemy, esperant par son moyen trouver par luy sa vangeance contre le pere: & encore que son intention ne luy reüssist à souhait; toutesfois il n' y avoit en cecy matiere de luy faire son procez, non plus qu' à la Royne Fredegonde qui reellement & de fait avoit faict mourir Sigebert. Adjoustez qu' apres la rupture de ce mariage, Brunehaud ayant esté reintegree en sa ville de Mets, on ne pouvoit plus luy rien imputer. Comme aussi est-ce la verité recogneüe par le mesme Gregoire, qui m' est en ce sujet un autre Evangeliste, si ainsi me permettez de le dire, que Meroüee fut tué, non par le commandement de son pere; ains à son deceu, par les menees de Fredegonde sa belle mere. Car quant à la mort de Chilperic, jamais on n' en soupçonna Brunehaud. Recours à toute l' histoire du mesme Gregoire, voire à celle de Aimoïn, qui fait tomber ce meurtre sous le glaive de Fredegonde & Landry. Et de fait toute la querelle que Childebert avoit dedans Gregoire contre son oncle Gontran, estoit a fin qu' il permist la porte luy estre ouverte à se vanger contre

Fredegonde & Clotaire son fils, tant de la mort du Roy Sigebert son pere, que de celle du Roy Chilperic son oncle. Et pour monstrer que ce n' estoit feintise, soudain que Gontran eut les yeux clos, Childebert leva les armes contre eux. On accusa en quatriesme lieu cette Princesse, d' avoir fait mourir un autre Meroüee fils de Clotaire, je vous prie de considerer la sottie de cet impropere. Il y eut pres de la ville d' Estampes une bataille donnee entre les Roys Clotaire & Theodoric, l' armee de Clotaire estoit conduite par Landry Maire de son Palais, sous l' authorité de Meroüee son fils; celle de Theodoric sous sa banniere & authorité par Arnoul Maire de son Palais grand Capitaine, lequel y mourut, mais en mourant obtint la victoire au Roy son Maistre; & de l' autre costé fut pris Meroüee: Quelle fut depuis sa fin, l' Histoire n' en parle point, au moins on se fait accroire qu' on le fit mourir en prison, & y en a tres-grande apparence: Mais de l' attribuer à Brunehaud, il n' y en a nulle preuve; au contraire si en ces obscuritez la vray-semblance tient souvent lieu de la verité, il y a bien grande apparence que pour vanger la mort qui luy avoit procuré une si grande victoire, il s' estoit voulu vanger sur la vie de Meroüee. Aimoïn rudoyant par aigres paroles Brunehaud, objecte à Brunehaud que par ses frequentes & souvent reïterees importunitez, donnant à entendre à Theodoric que Theodebert n' estoit son frere, avoit semé la zizanie de division entr'eux, cause de la ruine fatale de Theodebert: induisant par cela que Theodoric estoit l' agresseur. Au contraire celuy qui fut promoteur des guerres d' entre les deux freres fut Theodebert (esquelles il rendit les abois) par le tesmoignage du mesme Aimoïn. Pour 5. chef de son accusation, on luy mit sus qu' elle avoit fait mourir le Roy Theodebert son petit fils. Si vous parlez à Fredegaire, il fut fait prisonnier par Theodoric, & confiné de Colongne en la ville de Chaalons sur Saone: Nulle mention de sa mort: Si à Aimoïn, il fut traistreusement meurtry par l' un des citoyens de Colongne, qui fit tout aussi tost present de sa teste à Theodoric. Les choses estans telles, comment y pouvez vous engager le fait de la Royne Brunehaud? Et neantmoins pour ne flatter sous faux gages son histoire, je veux croire que luy ayant esté envoyé elle luy fit prendre la tonsure de Clerc, & quelque temps apres tuer pour faire plaisir au Roy Theodoric, car ainsi l' apprens-je de Jonas en la vie de S. Colombain: Jonas dis-je qui florissoit de ce temps-là. Pour 7. chef on luy impute qu' elle avoit fait mourir Theodoric puis trois de ses enfans. Quant à Theodoric, à la verité telle est l' opinion d' Aimoïn, mais desmenty par Fredegaire son devancier qui le declare estre mort d' un flux de sang: & cestuy pareillement par Jonas qui dit que ce fut d' un coup de foudre. Et pour le regard de ses trois enfans, fut-il jamais histoire plus digne d' un Escolier, ou d' un Moine claustral que cette-cy?, qu' à la veüe de tous Clotaire en fit mourir deux, & le troisiesme sous main, feignant de le vouloir conserver, & neantmoins que ces trois cruautez soient rejettees sur cette malotruë Princesse? Joint que ce ne fut elle qui fit prendre les armes par le Roy Clotaire contre ses enfans; & de ce je n' en veux meilleur tesmoin qu' Aimoïn. Or combien que selon le droit commun du genre humain il ne fust en la puissance du Roy Clotaire de faire le procez extraordinaire à cette Dame, Royne & Princesse souveraine, & ores qu' en sa puissance il eust esté, toutes-fois que toutes ces imputations fussent fausses & calomnieuses, horsmis une, sans en faire aucune perquisition, sans avoir esgard, ny à son sexe, ny à la longueur de son aage, qui estoit de 73. ans, ny à sa qualité de fille, femme, mere, ayeule, & bisayeule de Roys, elle fut horriblement traictee de la façon que je vous ay cy-dessus discouru. Cruauté qui n' eut oncques sa pareille en son tout. Et qui est plus espouvantable, c' est qu' elle proceda de la part d' un Roy, non seulement debonnaire & clement; ains la mesme debonnaireté par dessus tous nos Roys de la premiere lignee. Qui a fait estimer à quelques uns, que cette histoire estoit fabuleuse. Discours que je reserve au chapitre prochain.

10. 6. Comparaison des deportemens de Fredegonde & Brunehaud, Roynes, selon l' ancienne leçon.

Comparaison des deportemens de Fredegonde & Brunehaud, Roynes,  selon l' ancienne leçon. 

CHAPITRE VI.

Quand je considere ces deux Princesses, dont nos Histoires ont tant parlé, je trouve en elles deux ambitions grandement contraires, soubs lesquelles toutesfois nostre France fut contrainte de flechir les genoux. En Fredegonde une ambition relevee, en Brunehaud une ambition mousse & ravalee; & tant de male-façons en toutes les deux, que les papiers de ceux qui en ont escrit, doivent rougir, ou de honte, ou du sang qu' elles firent espandre pour la conservation de leurs grandeurs sous divers regards. Une Fredegonde simple Damoiselle, faite par mariage femme & mere de Roy, n' avoir jamais guerroyé les siens; ains seulement ceux qu' elle estimoit pouvoir nuire à la future royauté de ses enfans, quand elle en avoit plusieurs, & finalement de son fils Clotaire, reste & demeurant de tous les autres. En quoy elle mit toutes pieces en œuvre, sans espargner le Sang Royal: Princesse qui ne douta d' un cœur  guerrier & magnanime se trouver au milieu des combats. Quoy faisant elle conserva à son fils non seulement son Estat, mais qui plus est il se veit en fin Monarque des deux Frances. Et au bout de tout cela, apres une infinité de traverses, & la mere, & le fils moururent de leurs morts naturelles en leurs lits. Au contraire une Brunehaud fille, femme, mere, ayeule, bisayeule de Rois, avoir non seulement fait la guerre à ses serviteurs domestiques, ains à ses propres enfans, semant entre les freres des divisions, par le moyen desquelles elle pensoit maintenir sa toute-puissance sur eux. Et combien qu' elle fortifiast ses actions, non par coups de main, comme l' autre; ains d' une bigotterie, & masque de Religion, qui n' est pas un petit secret pour gaigner le cœur de la populace. Toutesfois pendant qu' elle affligea de telle façon les siens, elle favorisa de tant plus les affaires du Roy Clotaire son ennemy. Tellement que pour fin de jeu, ses enfans perdirent, & leurs vies, & leurs Royaumes, & la malheureuse mere mourut par les mains d' un bourreau: Cette-cy est la commune leçon de tous nos Historiographes: je vous discourray en un autre lieu quelle en est mon opinion.

Histoires vrayement prodigieuses, mais quand je repasse à bon esciant sur celle de Fredegonde & Clotaire, je n' en trouve une seule en son tout dedans l' ancienneté qui soit esmerveillable comme cette-cy. De maniere que lisant Machiavel, en son traicté du Prince au Chapitre où il discourt des Seigneurs, qui par sceleratesse & meschanceté s' estoient faits grands (discours qui ne luy est desagreable) il devoit ce me semble choisir pour archetype en ce sujet, non un Cesar Borgia fils du Pape Alexandre sixiesme; ains nostre Fredegonde. En celuy-là veritablement il recite plusieurs meschancetez, dont il accompagnoit toutes ses actions, par le moyen desquelles il se fit Maistre de quelques villes, & se promettoit de se faire Duc de la Toscane. Esperance dont il fut toutes-fois deceu par soy mesme: Car ayant convié quelques Cardinaux à souper dont il se vouloit deffaire, il commanda à son sommelier de leur donner à boire du vin qui estoit dans quelques bouteilles empoisonnees: estimant qu' ayant la fin de tous ces Cardinaux, il viendroit puis apres à chef de ce qu' il brassoit dessus la Toscane: Mais Dieu voulut que le sommelier prenant l' une des bouteilles pour l' autre, donna du vin empoisonné au Pape Alexandre VI. son pere, dont il mourut, & les Cardinaux furent conservez. Et par cette mort Borgia perdit son bras dextre, & tout d' une main ses detestables esperances & furieuses executions. Mais en nostre Fredegonde, combien que son histoire soit composee de mesmes façons de meschancetez que l' autre, voire plus hardies; si est-ce que l' estoffe en est bien plus riche, & les evenemens plus heureux. Premierement il eust trouvé en elle l' histoire, non d' un homme, ains d' une femme, consequemment plus admirable, & non d' une Roine de son premier estre, ains d' une simple Damoiselle, qui par ses doux allechemens s' estoit du commencement faite Maistresse du Roy Chilperic, & depuis facilité toutes voyes à la Royauté, & souverain degré de grandeur. Une Audoüere premiere femme de Chilperic repudiee par l' artifice de cette-cy: la seconde estranglee à son instigation: En fin mariage du Roy avec elle. Un Roy Sigebert sagement assassiné par son conseil lors que son mary & elle estoient au dessous de toutes affaires. Princesse qui apres cette mort fit mourir les Princes Meroüee, & Clovis enfans du premier lit de son mary, & tout d' une suite leur mere; ensemble tous les Seigneurs qu' elle pensoit avoir part en leurs bonnes graces. Et en apres donnant toute bride à ses voluptez avec son Landry, & qui depuis pour couvrir son adultere avoit fait tuer son mary. Mais c' est icy où Machiavel se pouvoit sous meilleurs gages joüer de sa plume: car cette Dame estant demeuree chargee d' un enfant de 4. mois seulement, soupçonnee de ce meschant meurtre, accusee de sa conscience, poursuivie par le Roy Childebert fils de Sigebert son ennemy, sceut si bien joüer son rolle, qu' elle se developpa à la fin de toutes ces perplexitez, tant par une sanglante renardise, dont elle tenoit en cervelle ses amis & ses ennemis, que par un cœur masle & guerrier, quand les occasions s' y presenterent. Et apres tous ces tours de souplesse, Dieu permit qu' elle mourut d' une mort calme dans son lict, contre l' ordinaire de ceux qui se meslent de tels mestiers. Toutes les meschancetez par elle commises furent pour conserver la Couronne à son fils Clotaire. 

Or voyez en quel champ eust esté maintenant Machiavel. Fredegonde mere allant de vie à trespas laissa Clotaire seulement aagé de 14. ans; aage foible, & partant aucunement sujet à mutations selon le monde. D' ailleurs sa Couronne conservee par les meschancetez de sa mere, consequemment sujette à revoltes selon les jugemens de Dieu. Toutesfois jamais Roy pendant sa vie ne se trouva plus heureux que cestuy-cy. Son heur voulut que Brunehaut son ennemie, par un jugement sot & bijarre se fit ennemie de ses propres enfans. Moyen par lequel elle conserva non seulement le Roy Clotaire & sa Couronne; ains luy fit voye en celles de ses enfans: Et finalement pour s' asseurer de toutes craintes, il fit mourir par un grand coup d' Estat, & la bisayeule, & les enfans bastards de Theodoric son petit fils. Achevant sa fortune par où l' Empereur Auguste commença la sienne: quand avec Lepide & Marc-Antoine ses associez il fit mourir, non seulement leurs ennemis, ains amis qui pouvoient apporter quelque obstacle à l' acheminement de leurs grandeurs, quoy faisant apres la mort de ses compagnons s' estant fait maistre universel de l' Empire Romain, il continua sa vie au gré & contentement de tout le peuple, & apres son trespas lors de la promotion des nouveaux Empereurs, on souhaittoit par acclamations publiques, qu' il fust aussi plus heureux qu' Auguste: Au contraire Clotaire apres plusieurs traverses de la fortune fit mourir les Princes qui le pouvoient vraysemblablement inquieter: mais tout soudain se moyenna, tout ainsi qu' Auguste, tout repos en sa Monarchie, & mourut d' une douce mort comme luy. Et le Greffier du Tillet escrivant sa vie l' honore de cette qualité de grand Clotaire. Vray qu' il eut une particularité dessus Auguste; d' autant que dés l' aage de 4. mois il fut fait Roy, & Auguste seulement Empereur en l' aage de 20. à 21. an. Veit on jamais procedures telles, ny catastrophe de Tragedie historiale pareille à cette-cy? Et c' est pourquoy je dis & soustiens hardiment que Machiavel se devoit mettre cette Fredegonde en bute dedans son chapitre de la Sceleratesse, comme parangon de toutes les autres.

4. 23. Des Epithetes que nos ancestres donnerent à quelques uns de nos Roys par honneur, aux autres par attache.

Des Epithetes que nos ancestres donnerent à quelques uns de nos Roys par honneur, aux autres par attache. Depuis quel temps apres leurs decez leurs Epithetes se sont tournez en ceremonie, ensemble sommaire discours sur les surnoms.

CHAPITRE XXIII.

Ceux qui nous ont laissé par escrit les anciennetez des Egyptiens, nous racontent que lors que leur Roy estoit allé de vie à trespas, c' estoit une coustume ordinaire d' exposer son corps à la veuë de tout le peuple, a fin qu' il fust loisible à chacun de le loüer ou accuser publiquement des choses que l' on estimoit avoir esté par luy bien ou mal faites. Et si par cas d' adventure il se trouvoit qu' en cette balance de loüange & d' accusation, la pluralité des voix passast pour ceux qui se plaignoient de ses extorsions & tyrannies, alors luy estoit toute sepulture interdite. Qui estoit l' une des choses qu ils redoutoient le plus, non seulement pour l' ignominie qui leur estoit faite par ce moyen: mais aussi que la commune opinion estoit que leurs ames estoient sans cesse vagabondes, jusques à ce que leurs corps fussent mis au cercueil selon leurs ceremonies. Cela fut cause que les Princes estoient semonds de n' extravaguer hors les bornes de leur devoir, pour la peine qu' ils voyoient leur estre preparee apres leur mort: laquelle n' estoit, ce leur sembloit, passagere, ains duroit à perpetuité. Quant à nous qui sommes nourris en la vraye doctrine de Dieu, encores que ne devions avoir autre crainte pour nous inviter à bien faire que celle que nous rapportons des Evangiles: toutesfois voyant que la plus grande partie des Nobles, & grands Seigneurs s' enyurent tellement de l' honneur mondain, que sans l' alechement d' iceluy, ils oublieroient plusieurs choses de leur devoir: si j' osois employer mon souhait à l' endroit de nos Roys, je voudrois non pas qu' ils fussent exposez de la façon des Egyptiens: mais bien que sans flaterie on leur donnast tiltres, aussi bien tirez de leurs vices, que de leurs vertus, a fin que tout ainsi que les tiltres d' honneur seroient envers leurs successeurs, comme un esperon de vertu, aussi les taches leur servissent comme d' une bride pour les destourner de mal faire.

Et vrayment si nous voulons icy remarquer l' ancienneté de la France és Epithetes que nous donnons à nos Roys apres leurs trespas, nous trouverons que du commencement ils se donnoient sans aucune solemnité, par un taisible consentement de tout le peuple, selon les merites ou demerites qu' on avoit veu regner en eux. De là vint que par la voix commune de tous, ce grand guerrier Charles, pere de Pepin, fut surnommé Martel, du nom de Mars, & son petit fils Charles le grand, autrement Charlemagne, d' un mot François, & my-Latin. Et sous la troisiesme lignee de nos Roys, Hugues Capet, pour le bon sens qui estoit en luy: Philippes II. le Conquerant, parce qu' il avoit conquis & reüny à sa Couronne tout ce que les Anglois possedoient en & au dedans de la France. Et si nous fusmes liberaux en ces loüables Epithetes envers ceux qui le meritoient, nous ne feusmes non plus avaricieux de leur donner des attaches sur les defaux qui estoient en eux. Nous appellasmes un Charles le Simple, & un Louys le Faineant. Quelques uns estiment que Louys VII. pere de Philippes le Conquerant eust esté surnommé le Jeune, parce que sur un umbrage tel quel, il avoit repudié Leonor sa femme, seule heritiere du Duché de Guyenne, & Comté de Poictou, laquelle se maria depuis à Henry II. Roy d' Angleterre: accroissant grandement par ces deux pieces son Estat, au grand dommage de la France: Mais en cette opinion ils s' abusent, d' autant qu' il fut appellé le Jeune à la difference de Louys le Gros son pere. Ayant esté du vivant de luy fait & couronné Roy de France. Chose que l' on voit à l' œil par le privilege de la Regale qu' il octroya à l' Archevesque de Bourdeaux, portant ces mots. Ego Ludovicus iunior, Magni Ludovici filius, duquel j' ay cy-dessus parlé au troisiesme Livre. Et neantmoins il meritoit vrayement le tiltre de Jeune, par la repudiation par luy faite. Voyla quant aux Epithetes concernans les fautes de l' esprit. Car quant à ceux qui touchoient les vices du corps, je souhaitterois que ne les eussions remarquez, comme quand nous dismes Pepin le Brief, Charles le Chauve, Louys le Begue, Louys le Gros.

Or n' estoient tous ces Epithetes donnez par ceremonie. Nos Roys en joüissoient lors par la voix commune du peuple en bien, ou en mal faisant, & dura cela jusques à Philippes de Valois: Car comme Philippes quatriesme fut appellé Philippes le Bel, & de ses trois enfans, l' un Hutin, l' autre le Long, l' autre encores le Bel, remarques que l' on tiroit en eux ou du corps, ou de l' esprit, le premier pour lequel commença cette ceremonie d' Epithetes par flaterie, fut Philippes de Valois, lequel du commencement fut appellé le Fortuné par tout le peuple: Parce que Fortune l' avoit ce sembloit conduit par la main à ce haut tiltre de Roy par la mort de ses trois Cousins qui estoient decedez sans hoirs masles, luy qui sembloit lors du decez de Philippes le Bel estre grandement esloigné de la Couronne. Depuis il fut nommé l' Heureux, pour la grande victoire qu' il avoit euë contre les Flamans: Toutesfois tous ces tiltres d' honneur s' esvanouirent avec sa vie, & luy en resta seulement un seul. Il avoit esté solicité, ainsi que j' ay deduit ailleurs, par Maistre Pierre de Congneres lors son Advocat en la Cour de Parlement, de refrener les Jurisdictions Ecclesiastiques, en ce qu' elles entreprenoient sur les droits du Roy & de ses sujets: Et de fait cette cause fut solemnellement plaidee d' une part & d' autre devant luy au bois de Vincennes: Toutesfois apres avoir oüy les parties, il declara que pour lors il ne remueroit rien de nouveau, ains lairroit (laissoit) les Ecclesiastics en leur ancienne possession. Chose qui leur fut si aggreable qu' ils commencerent à le haut loüer sur tous les autres: tellement qu' apres qu' il fut decedé, comme si la foy Chrestienne eust despendu de la manutention de telles Jurisdictions, il fut par cry public surnommé le Catholique, lequel tiltre ne luy est point depuis tombé, voire fut engravé sur sa sepulture, comme l' on peut voir en l' Eglise des Jacobins de Paris, dans laquelle fut son cœur ensevely: Et toutes-fois à prendre sans hypocrisie les choses, luy mesme durant sa vie se surnomma tel qu' il estoit. Car apres la mal-heureuse journee de Cressy, s' enfuyant de la bataille au Chasteau de la Broye, le Chastelain voulant sçavoir qui estoit celuy qui luy demandoit l' entree, parce qu' il estoit ja nuict close, il luy respondit que c' estoit la Fortune de la France: Et certes non sans grande raison: Car depuis cette deffaicte n' advindrent que toutes miseres au Royaume.

Depuis que le Clergé eut faict cette ouverture, on tira cela en Coustume, & chercha-l'on apres le decez de nos Roys dans leur vie passee, la plus grande vertu qui eust reluy en eux pour les en surnommer, à cry public & son de trompe, comme nous voyons que Jean fils de Philippes de Valois, fut apres son decez appellé le Bon. Charles V. le Sage & le Riche: parce que l' on remarquoit en luy, qu' il avoit eu des affaires de guerre autant & plus qu' aucun autre de ses devanciers: davantage avoit construit plusieurs grands bastimens tant en Eglises que Chasteaux: Et outre ce avoit fait plusieurs belles donations & fondations: Et neantmoins se trouvoit qu' au bout de toutes ses affaires & despences, il avoit laissé apres son decez un fonds infiny de deniers: Au moyen dequoy, à bonne raison sembloit-il que l' on le deust appeller Sage & Riche: combien que pour le regard de la Sagesse il fit un grand pas de Clerc, lors qu' il espousa pour son plaisir Jeanne de la maison de Beau-jeu, estant en son choix d' espouser la fille & unique heritiere de Flandres, qu' il laissa espouser à son frere Philippes Duc de Bourgongne. En cas semblable fut Charles VI. surnommé le Bien-aimé, parce comme je croy, que le hazard du temps ne luy donna jamais le loisir de se faire hayr de son peuple: D' autant qu' il entra au Royaume en aage de minorité, & estant sous le gouvernement des Ducs d' Anjou & de Berry ses oncles, & peu apres se trouvant alteré de son bon sens, l' on remettoit les fautes qui estoient commises plustost sur ses Gouverneurs que sur luy. Louys XII. Pere du peuple, François I. le Clement, & Zelateur des bonnes Lettres: Henry son fils le Belliqueux. Nous ne sçavrions assez honorer nos Roys. Bien diray-je que quand par flaterie nous voulusmes honorer leurs memoires, les affaires de nostre France ne s' en sont pas mieux portees.

Or n' emportent tels Epithetes aucune remarque des surnoms, ains sont seulement tiltres honorables, dont on revest nos Roys apres leurs decez. Aussi ne se trouve-il point qu' ils ayent jamais usé de surnoms, ny mesmes les Princes, qui leur attouchoient de quelque degré de consanguinité en ligne masculine. Car ce que nous appellasmes la ligne des Roys n' agueres regnans sous le surnom de Valois, & nostre Roy à present regnant HENRY DE BOURBON, comme aussi tous les autres Princes qui luy attouchent de proximité de lignage, ce sont surnoms tirez de leurs principales Seigneuries. Et est cecy cause que nos Roys & tous les Princes ne sous-signent que de leurs noms. Et certes il n' y a rien où je me trouve tant empesché, qu' en la varieté qui s' est rencontree aux surnoms. Repassez par la Republique de Rome auparavant qu' elle fust asservie sous la puissance d' un Empereur, ils avoient quelques-fois trois noms, comme Marcus Tullius Cicero, & d' ordinaire deux. Descendez quelques deux ou trois cens ans sous l' Empire, vous n' y en trouverez le plus souvent qu' un seul. Mesmes tous ces grands personnages, dont les uns firent profession des armes sous l' Empereur Justinian, les autres du droict, ne se trouvent qualifiez que d' un nom, Belissaire, Joannes Tribonian, Theophile, Dorothee: & peut-estre n' est-il hors de propos d' estimer que nos premiers François n' usoient non plus de surnoms: au moins n' en trouverez vous aucuns en tous nos livres anciens. N' estoit que nous voulussions dire que nos ancestres n' eussent voulu inserer leurs surnoms par contemnement & mespris, ains se contentassent sans plus d' estre designez par leurs noms. Car nous voyons un Jean de Mehun avoir seulement pris celuy de la ville en laquelle il estoit né, combien qu' il fust surnommé Clopinel. En cas semblable le Sire de Joinville qui nous escrivit la vie de sainct Louys, semble avoir voulu oublier le sien au commencement de son œuvre, posé que par son Histoire il face mention d' un sien frere appellé Messire Jean le Brun Connestable de France: & tout de cette mesme façon ces doctes Religieux qui florirent en l' Abbaye de sainct Victor joignant Paris, se contenterent de mettre au lieu de leurs surnoms, le nom du Monastere, auquel ils faisoient profession tant de la Religion, que des disciplines, comme nous voyons que Hugues, Adam, & Richard, personnages celebrez en leur siecle, pour tout surnom s' appellerent de S. Victor. Toutesfois c' est une chose esmerveillable qu' en tous ces bons vieux autheurs, dans un Gregoire, Adon, Aimoïn, Reginon & autres, vous ne trouvez un seul nom accompagné de surnom. Et plus encores comme il soit depuis advenu qu' il n' y ait aujourd'huy famille Roturiere en nostre France, qui n' ait son surnom. Si vous parlez à du Tillet, il vous dira que ces surnoms ont esté donnez à uns & autres par forme de sobriquets. Il faut doncques qu' ils soient tous intelligibles, & neantmoins de cent mille, il n' y en a pas cent qui ayent aucune signification: Tellement qu' il semble que ce soit un, je ne sçay quel Daimon qui nous les ait imposez.

6. 18. Traict memorable de Chevalerie, courtoisie, & liberalité du Chevalier Bayard.

Traict memorable de Chevalerie, courtoisie, & liberalité du Chevalier Bayard.

CHAPITRE XVIII.

Apres avoir mis quelques discours des bonnes lettres sur le mestier, il ne sera hors de propos si pour contr'eschange, je donne icy lieu aux armes. J' ay au Chapitre precedent discouru sur la vie de Pierre Abelard, extraict d' une noble famille de Bretagne: Je vous representeray maintenant un Pierre de Bayard Gentil-homme du Dauphiné: Tous deux parangons, celuy-là aux bonnes lettres, cestuy-cy au faict des armes. Le premier sçavant & superlatif dessus les sçavans, d' un esprit bizarre, irrequiet, & presomptueux: Qui luy fit encourir plusieurs censures & reprimendes de ses superieurs. Le second vaillant dessus les vaillans, mais d' un esprit modeste, calme, & bien reiglé: Qui le feit aymer des grands, & honorer des petits: & par mesme moyen rapporter le tiltre de Bon Chevalier sans peur & sans reproche. Son trisayeul mourut aux pieds du Roy Jean à la journee de Poictiers, son bisayeul en celle d' Azincour sous Charles VI. son ayeul en la bataille de Mohtlehery, & son pere griefvement blessé en celle de Guinegaste. Belle production certes d' une Genealogie, pour rendre recommandable le Gentil-homme dont je parle, & neantmoins peu de chose, si la recommandation principale ne provenoit de son propre fonds. Toutes les loüanges que nous mandions de nos ancestres sont pauvres, quand nous manquons a nous mesmes. Jamais ne fut guerrier en son tout, accomply de tant de bonnes parties que luy. Les uns se trouvent accompagnez de proüesse, mais en eux quelques-fois defaut, ou le lignage, ou la prudence. Et ores que les deux s' y rencontrent, toutes-fois le mestier de la guerre engendre souvent le mespris de Dieu, & des hommes, en ceux qui pensent estre quelque outrepasse sur leurs compagnons. J' adjouste que pour se mettre plus aisément sur la monstre, ils logent avecques l' ambition d' honneur, souventes-fois l' avarice, aux despens du pauvre peuple, & tout d' une suitte, tantost la cruauté, tantost la paillardise selon les occasions. Tous vices esloignez de nostre bon Chevalier, qui n' avoit autre impression en son ame, premierement que l' honneur de Dieu, puis le service de son Roy, pour la deffence de sa Couronne. Liberal & courtois le possible, rendant aux Dames tel devoir que l' on peut desirer d' un preux Chevalier, & jeu sans vilenie. En toutes les escarmouches se trouvant tousjours à la pointe, pour faire teste à l' ennemy, & aux retraites le dernier, pour servir d' espaule aux siens: N' oubliant un seul point de bien obeïr à ceux qui avoient puissance de commandement sur luy, ny de bien commander, aux gendarmes qui estoient sous sa charge: Sage en ses advis aux deliberations de la guerre: Magnanime & prompt à la main aux executions: Magnanimité ordinairement suivie d' un heureux succez. Aimé non seulement des nostres, mais aussi de nos ennemis qui le redoutoient. Il poussa pied à pied sa fortune, premierement gendarme de la compagnie du Comte de Ligny, puis guidon, en apres chef d' une compagnie de gendarmes: & finalement Lieutenant de Roy. Servit trois Roys, Charles VIII. Louys XII. François I. Et singulierement ce dernier pour les paradoxes vertus qu' il recogneut en luy, le choisit pour recevoir l' Ordre de Chevalerie par ses mains. Plus belle closture ne pouvoit estre de son histoire que celle-là. Je n' ay pas icy entrepris de vous pourtraire tout au long sa vie, qui fut escrite d' une plume hardie en l' an 1527. par homme qui ne se voulut nommer, ains me contenteray de vous en refraischir par ce chapitre, la memoire, que je voy presque ensevelie par l' ingratitude des ans.

Pendant les guerres que nous eusmes sous le Roy Louys XII. en Italie contre les Venitiens, c' estoit un vray jeu de barres: tantost les villes prises par les uns, puis par les autres reprises. Entr'autres, la ville de Bresse estant retombée és mains des Venitiens, le Duc de Nemours Lieutenant general du Roy en la Lombardie, mit toute son entente à la remettre és mains de son Maistre, & y ayant mis le siege, comme il fallut aller à l' assaut, il avoit esté advisé par le conseil des Capitaines, que le Seigneur de Molart avecques ses gens de pied conduiroit la premiere pointe: Mais ayant chacun opiné, Bayard prit la parole, & dit au Duc de Nemours. Monseigneur sauf vostre reverence, & de tous Messeigneurs, il me semble qu' il faut faire une chose dont nous ne parlons. Interrogé par le Seigneur de Nemours que c' estoit. C' est, dit-il, que vous envoyez Monsieur de Molart faire la premiere pointe. De luy je suis asseuré qu' il ne rebouchera pas, ny beaucoup de gens de bien qu' il a avecques luy. Mais si les ennemis ont gens bien aguerris avecques eux, sçachez qu' ils les mettront à la pointe, & pareillement leurs harquebuziers: Or en telles affaires il ne faut jamais reculer: & si d' aventure ils repoussoient les nostres, & qu' ils ne fussent soustenus par la gendarmerie, il en pourroit sourdre un grand desordre. Parquoy je suis d' advis qu' avecques Monsieur de Molart on mette cent, ou cent cinquante hommes d' armes, lesquels seront pour beaucoup mieux soustenir le faix, que les gens de pied qui sont armez à la legere. Lors dit le Duc de Nemours. Vous dites vray, Monsieur de Bayard, mais qui est le Capitaine qui se voudra hazarder à la mercy de leurs haquebuttes? Ce sera moy s' il vous plaist (respondit Bayard) & croyez que la Compagnie dont j' ay la charge, sera aujourd'huy tel service au Roy & à vous, qu' aurez sujet & matiere de vous en contenter. Quand il eut ainsi parlé, tous les Capitaines se regarderent l' un l' autre grandement estonnez de cette offre si perilleuse. Toutes-fois ayant demandé la charge, elle luy demeura: Le Capitaine de Molart & ses gens vont à l' assaut, & sur les aisles estoit Bayard avecques les siens à pied tous gens de choix & eslite: car la plus part de ses gendarmes avoient esté, ou Capitaines en chef, ou des principaux membres des Compagnies: mais ils aimerent mieux apres, estre de sa compagnie que de commander, tant ils honoroient ses vertus. A bien assailly, bien deffendu: Et se jetta Bayard d' une telle furie, qu' il entra le premier, & passa le rampart, & apres luy plus de mille soldats. De sorte qu' ils gaignerent le premier fort. Mais cette hardiesse luy fut cher venduë. Car il receut un coup de picque dedans le haut de la cuisse, qui entra si avant que le bout rompit, & demeura le fer, & un bout du fust dedans. Bien pensoit-il estre blessé à mort: Au moyen dequoy il dit à Molart. Compagnon faites marcher vos gens, la ville est gaignee, de moy, je ne sçavrois tirer outre, car je suis mort. Le sang luy ruisseloit en grande abondance, lequel luy fut estanché par deux de ses archers, avecques leurs chemises qu' ils deschirerent, & en la premiere maison qu' ils trouverent desmonterent un huis, sur lequel ils le chargerent, & le plus doucement qu' ils peurent, avecques l' aide de quelques autres le porterent en une maison plus apparente qu' ils virent là à l' entour. C' estoit le logis d' un fort riche Gentil-homme, qui s' en estoit fuy en un Monastere: & sa femme estoit demeurée au logis, avecques deux belles filles qu' elle avoit, lesquelles s' estoient cachées en un grenier sous du foin. Quand on vint heurter à la porte, la Damoiselle resoluë d' attendre la misericorde de Dieu: voyant ce Chevalier que l' on portoit ainsi blecé luy ouvrit elle mesme la porte, laquelle il fit aussi tost refermer, & y mit les deux archers, leur disant: Gardez sur vostre vie, que personne n' entre ceans, si ce ne sont de mes gens. Je suis asseuré que quand on sçavra que c' est mon logis, nul ne s' efforcera d' y entrer. Et d' autant que pour me secourir, je suis cause que faillez à gaigner quelque chose, ne vous souciez, vous n' y perdrez rien, & je vous recompenseray d' ailleurs. Les Archers firent son commandement: Et il fut porté en une fort belle chambre où la Damoiselle le conduisit. Puis se jettant à genoux devant luy, parla en cette maniere, rapportant son langage au François. Noble Seigneur je vous presente cette maison, & tout ce qui est dedans: Car je sçay bien qu' elle est vostre, par le devoir de la guerre: mais je supplie tres-humblement vostre Seigneurie, qu' il vous plaise me sauver l' honneur & la vie, & de deux jeunes filles que mon mary & moy avons, qui sont prestes à marier. Bayard que je vous ay figuré pour miroüer de Chevalerie & d' honneur, luy respondit. Madamoiselle je ne sçay, si je pourray eschapper de ma playe. Mais tant que l' ame me battra au corps, à vous, ny à vos filles ne sera faict desplaisir, non plus qu' à moy: gardez les seulement en vos chambres, & donnez ordre qu' elles ne soient veuës: Il n' y a homme en ma maison qui s' ingere d' entrer en lieu, que ne vueillez, vous asseurant au demeurant qu' avez en moy un Gentil-homme qui non seulement ne vous pillera, mais vous fera toute la courtoisie qu' il pourra. Quand la bonne Damoiselle l' ouyt en cette façon parler, elle fut toute asseurée. Je vous laisse à part avecques quelle fureur fut prise la ville de Bresse, non seulement sous l' esperance du pillage, mais aussi pour le regret de la perte de nostre grand Achilles, chacun estimant que le bon Chevalier Bayard fust mort: Cela n' est point de mon suject. Je me contenteray de vous dire, que la Damoiselle fit venir un bon Chirurgien sien voisin qui visita la playe de Bayard grande & profonde, toutes-fois l' asseura qu' il estoit hors du danger de mort. Au second appareil le vint trouver le Chirurgien du Duc de Nemours qui le pensa, & en fit tres-bien son devoir: & quelques jours apres fit retourner en sa maison son hoste: Auquel il dit qu' il ne se donnast point de melancholie, n' ayant chez luy logé que de ses amis. Le Duc le venoit souvent visiter pour le consoler: & sur la rencontre de divers propos, luy raconta entr'autres choses, le desir que le Roy Louys douziesme son oncle avoit que pour l' asseurer du Milanois, on exterminast tout à fait l' Espagnol de la Lombardie. Et que la conclusion de ses lettres estoit d' une bataille: A laquelle le Duc s' estoit resolu par l' avis general de tous ses Capitaines, & souvent disoit à Bayard. Monsieur de Bayard mon amy, pensez de vous guerir: car je sçay bien qu' il faudra que donnions une bataille aux Espagnols entre cy & un mois, & si ainsi estoit, j' aymerois mieux avoir perdu tout mon bien que n' y fussiez, tant j' ay grande fiance en vous. Bayard respondit: Croyez Monseigneur que s' il est ainsi qu' il y ait bataille, tant pour le service du Roy mon Maistre, que pour l' amour de vous, & pour mon honneur qui va devant, je m' y ferois plustost porter en littiere que je n' y fusse. Le Duc luy fit plusieurs presens, selon sa puissance, & pour un jour luy envoya cinq cens escus, que Bayard donna aux deux Archers, qui estoient demeurez avecques luy quand il fut blecé, & apres avoir donné ordre aux affaires de la ville s' en partit en bonne deliberation d' accomplir le commandement du Roy qui luy estoit faict pour mettre fin à la guerre. Cette resolution fit une autre playe en l' esprit de Bayard, non moindre que celle du corps, craignant que pour l' incommodité de sa personne il ne peust estre de la partie. Luy venant chacun jour nouvelles du camp des François comment ils approchoient les Espagnols. Il avoit gardé cinq semaines le lit sans en partir: Mais sur ces nouvelles, il se fit lever pour sonder ses forces, & se promena quelque peu par la chambre. Et combien qu' il se trouvast foible, toutes-fois le grand cœur qu' il avoit ne luy donnoit le loisir d' y songer. Il envoya querir le Chirurgien qui le pensoit, & luy dit. Mon amy je vous prie me dire, s' il y a point de danger de me mettre en chemin, il me semble que je suis guery, ou peu s' en faut, & vous promets ma foy qu' à mon jugement, le demeurer d' oresnavant me pourra plus nuire qu' amander: Car je me fasche merveilleusement. Ses serviteurs avoient ja dict au Chirurgien le grand desir dont il brusloit d' estre à la bataille, & que tous les jours il ne regrettoit autre chose que de ne s' y trouver: Parquoy pour contenter aucunement son opinion, joinct l' estat de son mal, luy dit en son langage. Monsieur vostre playe n' est pas encores clause, toutes-fois par dedans elle est toute guerie. Vostre barbier vous verra habiller encore ceste fois, & mais que tous les jours au matin & au soir, il y mette une petite tente & une emplastre dont je luy bailleray l' oignement, il ne vous empirera point, & si n' y a nul danger: Car le grand mal de la playe est au dessus, & ne touchera à la selle de vostre cheval. Qui eust donné un Royaume à Bayard il n' eust pas esté plus content. Son Chirurgien fut plus que bien contenté, & se delibera de partir dans deux jours, commandant à ses gens que pendant ce temps ils meissent en ordre tout son cas.

La beauté de ce conte est, que son hostesse qui se tenoit tousjours sa prisonniere, comme aussi son mary & ses enfans, & que leurs biens meubles estoient siens (car ainsi en avoient faict les François aux autres maisons, comme elle sçavoit bien) eut plusieurs imaginations, estimant que si son hoste les vouloit traiter à la rigueur il tireroit d' eux à son partement plus de dix ou douze mille escus, eu esgard à la grandeur de leur bien & revenu, se delibera de luy faire quelque honneste present, se promettant, veu ses honnestes deportemens, & la gentillesse de son cœur, qu' il s' en contenteroit. Le matin dont le Chevalier devoit desloger l' apresdiner, la Damoiselle avecques un sien serviteur portant une petite boëtte d' acier, entra en sa chambre, où elle trouva qu' il se reposoit en une chaire, apres s' estre fort proumené, pour tousjours peu à peu essayer sa jambe, elle se jetta à deux genoux, mais incontinent il la releva, & ne voulut jamais souffrir qu' elle dit une parole, que premier ne fust assise aupres de luy, & puis commença son propos en cette maniere. Monseigneur, la grace que Dieu me fit à la prise de cette ville, de vous adresser en cette vostre maison, ne me fut pas moindre, que d' avoir sauvé la vie à mon mary, la mienne, & de mes deux filles, avecques ce qu' elles doivent avoir plus cher, qui est leur honneur. Davantage depuis qu' y arrivastes ne m' a esté fait, ny au moindre de mes gens une seule injure, mais toute courtoisie, & n' ont pris vos gens, des biens qu' ils y ont trouvez, la valeur d' un seul denier sans payer. Monseigneur, je suis assez advertie, que mon mary, moy, mes enfans, & tous ceux de la maison sommes vos prisonniers, pour en faire & disposer à vostre bon plaisir, ensemble des biens qui sont ceans. Mais cognoissant la noblesse de vostre cœur, à qui nul autre ne pourroit attaindre, suis venuë pour vous supplier tres-humblement qu' il vous plaise avoir pitié de nous, en eslargissant vostre accoustumee liberalité. Voicy un petit present que nous vous faisons: il vous plaira le prendre à gré. Alors prit la boëtte que ce serviteur portoit, & l' ouvrit devant le Chevalier qui la veit peline de beaux ducats. Mais luy qui d' un cœur genereux n' avoit jamais fait conte d' argent, se prit à rire, puis luy dit: Madamoiselle, combien y a-il de ducats en cette boëtte? La pauvre femme ayant peur qu' il fust courroucé d' en voir si peu, luy dit. Monseigneur, il n' y en a que deux mille cinq cens: mais si vous n' estes content, nous en trouverons plus largement. Alors il dit. Par ma foy, Madamoiselle, quand me donneriez cent mille escus, vous ne m' auriez pas tant faict de bien, que de la bonne chere que j' ay euë-ceans, & de la bonne visitation que m' avez faicte. Vous asseurant qu' en quelque lieu que je me trouve, aurez tant que Dieu me donnera vie, un Gentil-homme à vostre commandement. De vos ducats je n' en veux point, & vous remercie, reprenez-les. J' ay toute ma vie plus aimé les personnes que les escus, & ne pensez que je ne m' en aille aussi content de vous, que si cette ville estoit en vostre disposition, & me l' eussiez donnee. La bonne Damoiselle fut bien estonnee de se voir esconduite: Si se remit encores à genoux, mais gueres ne l' y laissa le bon Chevalier: & relevee qu' elle fut, luy dit. Monseigneur, je me sentirois à jamais la plus mal-heureuse femme du monde, si n' emportiez le peu de present que je vous fais, qui n' est rien au prix de la courtoisie que m' avez cy-devant faicte, & faictes encores de present par vostre grande bonté. Quand le Chevalier la vit ainsi ferme, & opiniastre en sa liberalité luy dit. Bien doncques Madamoiselle, je le prends pour l' amour de vous, mais allez moy querir vos deux filles: car je leur veux dire adieu. La pauvre femme qui cuidoit estre en Paradis de ce que son present avoit esté en fin accepté, alla querir ses filles, lesquelles estoient belles, bonnes, & bien enseignees, & avoient beaucoup donné de passe-temps au Chevalier durant sa maladie:

Parce qu' elles sçavoient fort bien chanter, joüer du lut, & de l' espinette. Si furent amenees devant luy, lequel pendant qu' elles s' accoustroient avoit faict mettre les ducats en trois parties, és deux, à chacune mil ducats, & à l' autre cinq cens. Elles arrivées se jettent à genoux, mais incontinent furent relevées: Puis la plus aisnée des deux commença de dire. Monseigneur, ces deux pauvres filles, ausquelles avez tant faict d' honneur que de les garder de toute injure, viennent prendre congé de vous, en remerciant tres-humblement vostre Seigneurie, de la grace qu' elles ont receuë, dont à jamais (pour n' avoir autre puissance) seront tenuës de prier Dieu pour vous. Le Chevalier quasi larmoyant, en voyant tant de douceur & d' humilité en ces deux belles filles, respondit: Mes Damoiselles vous faictes ce que je deurois faire, c' est de vous remercier de la bonne compagnie que m' avez faicte, dont je me sens fort vostre obligé. Vous sçavez que gens de guerre ne sont pas volontiers chargez de belles besongnes pour presenter aux Dames. De ma part il me desplaist grandement, que je n' en suis bien garny, pour vous en faire present. Madamoiselle vostre mere m' a donné deux mille cinq cens ducats, que voyez sur cette table. Je vous en donne à chacune mille pour ayder à vous marier: & pour ma recompense, vous prierez s' il vous piaist Dieu pour moy, autre chose je ne vous demande. Si leur meit les ducats en leurs tabliers voulussent ou non, puis s' addressa à la mere à laquelle il dict. Madamoiselle je prendray ces cinq cens ducats à mon profit, pour les departir aux pauvres Religions des Dames qui ont esté pillées, & vous en donne la charge: car mieux entendez où sera la necessité que toute autre, & sur cela je prends congé de vous, & leur toucha en la main à la mode d' Italie, lesquelles se meirent à genoux, plorans si tres-fort qu' il sembloit qu' on les voulust mener à la mort. Lors dit la mere, fleur de Chevalerie, à qui nul ne se doit comparer, le benoist Sauveur & Redempteur Jesus-Christ qui souffrit mort & passion pour tous les pecheurs, le vous vueille remunerer en ce monde, & en l' autre. Apres se retirerent en leurs chambres. Il fut temps de disner. Le Chevalier feit appeller son Maistre d' hostel, auquel il commanda que tout fust prest pour monter à cheval sur le midy. Le Gentil-homme du logis qui ja avoit entendu par sa femme la grande courtoisie de son hoste vint en sa chambre, & le genoüil en terre le remercia cent mille fois, en luy offrant sa personne & tous ses biens, desquels il pourroit disposer comme siens. Chose dont le Chevalier le remercia, & le feit disner avecques luy. Et apres ne demeura gueres qu' il ne demandast ses chevaux, tant luy tardoit qu' il n' estoit avecques sa compagnie par luy tant desiree, ayant belle peur que la bataille se donnast avant qu' il y fust. Ainsi qu' il sortoit de la chambre pour monter, les deux belles filles descendirent, & luy feirent chacune un present qu' elles avoient ouvré pendant sa maladie. L' un estoit de deux bracelets faicts de cheveux, d' or & d' argent tant proprement que merveilles: L' autre estoit une bourse sur satin cramoisy ouvrée subtilement. Grandement les remercia, & leur dit que les deux presens venoient de si bonnes mains, qu' il les estimoit hors de prix: & pour plus les honorer se feit mettre les bracelets aux bras, & meit la bourse en sa manche, avecques promesse que tant qu' ils dureroient il les porteroit pour l' amour d' elles. Sur ces paroles monta à cheval & vint trouver le Duc de Nemours qui l' attendoit avecques bonne devotion, & certes je ne pense point que l' on puisse representer Histoire diversifiée de tant de belles fleurs, comme cette-cy: & pour dire en un mot, de ce seul exemple vous pouvez recueillir quel fut le demeurant de sa vie.

8. 50. Beau pere, & autres mots concernans tant la Parenté, qu' Affinité,

Beau pere, & autres mots concernans tant la Parenté, qu' Affinité, ensemble de quelques autres mots, dont l' usage ne seroit peut estre hors propos.

CHAPITRE L.

Ceux qui ont espousé nos enfans, nous appellent leurs Beaux peres. Nous appellons encores les Religieux Beaux peres.

Mes beaux peres Religieux

Vous disnez pour un grand mercy.

O gens heureux! Ô demy Dieux!

Pleust à Dieu que je fusse ainsi.

Disoit Victor de Brodeau en ce huictain qui fut tant solemnizé sous le regne de François I. Mais dont est procedé que nous honorons d' un mesme mot, & ceux qui font profession du Celibat, & les autres qui ont enfans? Davantage que nous appellons seulement Peres ceux qui ont des enfans non mariez, & Beaux peres ceux qui ont des enfans mariez? Quant à moy je ne doute point qu' il ne faille appeller les uns & les autres Beats peres, au lieu de Beaux peres, les Religieux parce qu' ils semblent avoir espousé une vie saincte: Et les Peres, d' autant qu' en marians leurs enfans, ils semblent se moyenner une vie immortelle en ce mortel estre par une subrogation de l' un à l' autre. Si ma divination est bonne, ou mauvaise, je m' en rapporté à ce qui en est. Bien sçay-je que Rabelais en son troisiesme livre de Pantagruel appelle Beats peres les Moines que nous appellons Beaux peres: Toutesfois comme un erreur en ame ne fort aisément un autre, aussi avec le temps le peuple estimant qu' il fallut dire Beau pere, & non Beat pere, appella les meres Belles meres, & les gendres & brus, Beaux fils & Belles filles. Or puis que ce mot de Beau pere s' est presenté en ce lieu, il m' est tombé en memoire que nos ancestres par une honneste licence furent trop plus copieux és paroles de consanguinité, & affinité que nous autres, qui par une superstitieuse ignorance avons en cet endroit appauvri nostre vulgaire: Car ils userent du mot de Parastre, comme de Marastre, pour descouvrir celuy que nostre mere avoit espousé en secondes nopces, & semblablement de fillastre pour nommer le fils de nostre mary ou femme qui estoit issu d' autre mariage, ils appellerent Serourge celuy qui avoit espousé nostre Soeur, qui venoit de Sereur. Car ainsi appelloient-ils une Soeur de la diction Latine Soror, & depuis par abbreviation Soeur. Aussi fut à nos anciens fort familier & frequent, pour la proximité de parentage le mot de Nepueu, non pour le regard de l' oncle, ains de l' ayeul, c' est à dire pour ce que nous disons par un contour de langage Petit fils. De toutes lesquelles paroles vous verrez fort frequente mention dedans les grandes Croniques de France dediees au Roy Charles huictiesme. Mots toutesfois que nous ne mettons gueres pour le jourd'huy en usage, horsmis que le mot de Nepueu a commencé de reprendre petit à petit ses anciennes racines en nous par la liberté des Poëtes de nostre temps: Et à la mienne volonté qu' il se perpetuë en cette signification, a fin que tout ainsi que le Latin, nous puissions assortir nostre langue d' une enumeration graduelle des parens en ligne directe, de laquelle nous sommes mancques pour le jourd'huy: Car apres que vous avez nommé ayeul, pere, fils, & petit fils, vous demeurez court, & si vous aviez restably le mot de Nepueu en sa primitive, & plus vieille signification, il vous seroit loisible de dire pour les ascendans, pere, ayeul, bisayeul, & peut estre trisayeul, & pour les descendans, fils, nepueu, & arriere nepueu, ou tel autre mot dont l' oreille plus delicate se pourroit adviser. Et sçay bon gré à Denis Sauvage, Seigneur du Parc, lequel en sa traduction des Histoires de Paule Jove livre trente-septiesme, appelle Mahommet bisayeul, Amurath trisayeul de Solyman Empereur de Constantinople. Et devant luy celuy qui soubs le nom de Feal serviteur, fit imprimer la vie du Chevalier de Bayard en l' an mil cinq cens vingt sept, n' avoit usé du mot de Trisayeul, ains Terayeul au premier chapitre de son livre. A faute de quoy des Essars (homme qui toutesfois faisoit grande profession de bien escrire entre les courtisans de son temps) fut contrainct de dire au huictiesme livre de son Amadis, parlant de quelque Chevalier, qu' il estoit fils du fils de son fils, par une pauvreté qu' il sentoit estre pour cest égard en nostre langue. Nous voyons dans cette ville de Paris au Cimetiere de sainct Innocent un Epitaphe d' Yoland de Bailly veufve de Maistre Denis Capel, Procureur au Chastelet, portant qu' elle avoit vescu quatre vingt huict ans, & avoit peu voir deux cens quatre vingt huict siens enfans, & trespassa le dixseptiesme Avril mil cinq cens quatorze. Imaginez combien elle eust esté empeschee s' il luy eust convenu appeller d' un vray mot ceux qui estoient distans d' elle en la quatre ou cinquiesme generation & lignee.

Je diray cecy en passant, car peut estre ailleurs ne se presenteroit-il occasion d' en parler si à propos. Je voy nostre langue aujourd'huy mandier des mots du Latin, qui pourroient se trouver en elle mesme, quoy que soit qui n' en approcheroient comme ils en approchent. Nos Praticiens appellent une Procuration ad lites, celle qu' on envoye à Procureur pour occuper en une cause pour nous. Jean Bouteiller en son Somme Rural l' appelle Procuration à litige. Nous disons qu' un homme a esté pris en flagrant delict, quand il a esté surpris sur le fait, il le dit Estre pris en present mesfaict. Moindres d' ans peuvent comparoir par Tuteur, les soubs aagez par Curateur: Nous appellons les premiers Pupilles, & les seconds mineurs. Parastres, Marastres, Fillastres, fort frequens en cest autheur. Nous, suyvans les termes du Latin, divisons les obligations en contracts, & quasi contracts: Les obligations se divisent par contract, ou en obligation, si comme par contract. Dedans la coustume de Meaux & Vitry mainmettre, pour ce que nous disons ordinairement Manu mettre. Parastre, coustume de Meaux, & ancienne de Melun article cent quarante neuf. Nous disons quelquesfois au feur, c' est à dire au prix, & peu de personnes sçavent pourquoy. Mais le mot d' affeurer signifioit acheter. Dedans le vieux Coustumier de Normandie, chapitre vingt, titre des Usuriers. Tel a affeuré son cheval au feur, c' est à dire qu' il a acheté son cheval au prix &c. Nous appellons freres puisnez, ceux qui sont nez apres leurs aisnez. Et par adventure nous pourrions appeller non improprement Puisnez ceux qui sont nez apres le decés de leurs peres, qui furent par les Romains appellez Posthumes, & Mainez ou Mainnez ceux qui secondent ou tiercent en aages leurs aisnez, quasi moins nez. Car pour le regard du mot d' aisné, il est composé de deux, ores que de prime face, il ne le semble pas. Aisné, ains né, c' est devant né: Parce que ce mot de Ains se prend souvent en cette signification de Devant. Nos ancestres userent du mot d' anoutrie pour celuy d' adultere dont nous usons. Nos Coustumes appellent les serfs gens de mortemain, ou main morte par une Metaphore hardie. Particularitez par moy cy dessus touchees, non que je ne recognoisse fort bien que les anciennes paroles viennent d' un mesme fonds, que les modernes: Mais je souhaiterois volontiers s' il y avoit moyen de ce faire, de nous rendre les mots naturels & qu' ils semblassent prendre leur estoc de nous, ores qu' ils fussent transplantez. Toutesfois puis que le peuple s' est faict Juge Souverain des paroles de toute ancienneté, je m' en remettray à son usage, me contentant de sçavoir ce que je pense devoir estre faict.